‘முத்து என்கிற காட்டான்’ இணையத் தொடர் விமர்சனம்!

சென்னை:

விஜய் சேதுபதி, மிலிந்த் சோமன், சுதேவ் நாயர், முத்துக்குமார், சிங்கம் புலி, கலைவாணி பாஸ்கர், வி ஜே பார்வதி, ரிஷா ஜேக்கப், வடிவேல் முருகன், அபி நட்சத்திரா ,பாலாஜி சக்திவேல் ,சிந்து, இர்ஷாத் அலி, அரிஸ்டோ சுரேஷ், சுனிதா சந்திரன், ஆர் அமரேந்திரன், சாதனா உள்ளிட்ட பலர் நடித்துள்ள இணையத் தொடர் ‘முத்து என்கிற காட்டான்’.

ஜியோ ஹாட் ஸ்டார் டிஜிட்டல் தளத்திற்காக இந்த இணையத் தொடரை விஜய் சேதுபதிபுரொடக்ஷன்ஸ் நிறுவனம் சார்பில் நடிகர் விஜய் சேதுபதி தயாரித்திருக்கிறார். மணிகண்டன் – பி. அஜித் குமார் இருவரது இயக்கத்தில் இத்தொடர்  உருவாகியுள்ளது.

தமிழ் வெப் சீரிஸ்களில் புதுமையான கதைகளை சொல்லும் முயற்சிகள் தொடர்ந்து அதிகரித்து கொண்டு வரும் நிலையில், மாறுபட்ட கதை அம்சம் உள்ள ‘முத்து என்கிற காட்டான்’ அந்த வரிசையில் தற்போது வெளி வந்து அனைவரும் பாராட்டுகின்ற அளவிற்கு பத்து அத்தியாயங்கள் கொண்ட இந்த இணையத் தொடர்  வெற்றி பெற்றுள்ளது.

அதிகமாக மக்கள் தொகை இல்லாத ஒரு கிராமத்தில்  முத்துக்குமார், சிங்கம்புலி உள்ளிட்ட சில காவலர்கள் பணியாற்றுகின்ற காவல் நிலையம் இருக்கிறது. அந்த காவல் நிலையத்தில் எந்தவித புகார்களும் வராத காரணத்தால் காவல் துறை அதிகாரிகள் அந்த காவல் நிலையத்தை மூடிவிட  முடிவு செய்கிறார்கள். இந்த சூழலில் அந்த கிராமத்திற்கு அருகில் உள்ள அதிகம் ஆள் நடமாட்டம் இல்லாத பகுதியில் விஜய் சேதுபதியின் தலை  வெட்டப்பட்டு ஒரு பாறையின் மீது கிடக்கிறது. அங்கு வந்த ஒரு சிறுவன் அந்த தலையைக் கண்டதும் காவல் துறையினருக்கு தகவல் கொடுக்கிறான். உடனே அங்கு வந்த காவலர்கள் விஜய் சேதுபதியின் தலையை கண்டவுடன் அதிர்ச்சி அடைந்து வெட்டப்பட்ட தலையை கைப்பற்றி அந்த தலைக்கு ஏற்ற உடலை காவல்துறையினர் தேடுகிறார்கள். உடல் பகுதி பல இடங்களில் தேடியும் கிடைக்கவில்லை.

கொலை செய்யப்பட்டது யார்? என்பதை கண்டுபிடிக்க முயலும் காவல் துறையினர் விசாரணையை தொடங்கும் போது, விஜய் சேதுபதியின் பெயர் முத்து என்பது தெரிய வருகிறது. அவர் ஒரு சாதாரண வாட்ச் கடையில் வேலை செய்யும் மனிதனாக தெரியும் முத்து, உள்ளுக்குள் மிகப் பெரிய மனிதநேயத்தை கொண்டவர் என்பதும் மதுரையில் கண்மணிநடனக் குழுவில் ஆடும் பெண் அவமானப்படுத்தும் போது திடீரென்று உள்ளே நுழைந்து தனது முரட்டுத்தனத்தைக் காட்டுவதும், ஒரு ஓட்டல் அதிபரிடம் லட்சக் கணக்கில் பணத்தைக் கொடுத்து அங்கு பணி புரியும் வயதான பெரியவருக்கு உதவி செய்து உரிமையாளர் ஆக்குவதும் என  ஏன் அவர் எல்லோருக்கும் உதவி செய்கிறார்? என்ற கேள்விகளுக்கு பதில் சொல்லும் இந்த இணைய தொடர்தான் ” ‘முத்து என்கிற காட்டான்’.

முத்து என்ற காட்டான் பற்றியும், அவரது பயணத்தின் பின்னணி பற்றியும்,  அறிந்துக் கொள்ள ஆவலை தூண்டும் வகையில், ஒவ்வொரு அத்தியாயத்தையும் மர்மமும், மனிதநேயமும் கலந்த முறையில் பயணிக்க வைத்திருப்பதை பாராட்ட வேண்டும்.

முத்து என்ற கதாபாத்திரத்தில் விஜய் சேதுபதி நடித்திருக்கிறார். அவர் நல்லவரா கெட்டவரா என்று அறிய முடியாத,  கடிகாரம் பழுது நீக்கும் கடைப் பணியாளர், யானைப் பாகன், சரக்கு வாகன ஓட்டுநர், பெண் நடனக் கலைஞர்களின் பாதுகாவலர் எனப் பல கதாபாத்திரங்களில் விஜய் சேதுபதியை தவிர வேறு யாராலும் இவ்வளவு தைரியமாகவும் நம்பிக்கையுடன் நடிக்க முடியாது என்பதே யதார்த்தமான உண்மை. தனது எளிமையான நடிப்பால் அத்தனை கதாபாத்திரங்களிலும் கச்சிதமாக பொருந்துவதோடு, அந்த கதாபாத்திரமாகவே வாழ்ந்திருக்கிறார்.

சிட்டு எனும் துறுதுறுபெண் வேடத்தில் நடித்து அனைவரையும் ஈர்த்திருக்கிறார் அபி நட்சத்திரா. ரிஷாஜேகப்ஸும் அவருக்கு இணையாக நடித்திருக்கிறார். லலிதா எனும் மதுரைப்பெண் கதாபாத்திரத்தில் வி.ஜே.பார்வதி அதற்கு ஏற்றவாறு மாறி நடித்து இருக்கிறார்

இதில் நடித்திருக்கும் பிற நடிப்பு கலைஞர்கள் மிலிந்த் சோமன், சுதேவ் நாயர், முத்துக்குமார், சிங்கம் புலி, கலைவாணி பாஸ்கர், பாலாஜி சக்திவேல், வடிவேல் முருகன் ஆகியோரும் தங்களுக்கு கொடுத்த  கதாபாத்திரத்தில் குறை சொல்ல முடியாத நடிப்பை வழங்கி உள்ளனர்.

இசையமைப்பாளர் ராஜேஷ் முருகேசனின் பின்னணி இசை, கதையின் உணர்ச்சிகளை மேலும் உயர்த்தி இந்த தொடருக்கு மிகப்பெரிய பலம் சேர்த்திருக்கிறது.

கதை பல்வேறு பகுதிகளில் பயணித்தாலும், ஒரே மாதியான வண்ணங்களை பயன்படுத்தி சிறந்த காட்சிகளுடன்  வேறு ஒரு அனுபவத்தை கொடுக்கும் வகையில் ஒளிப்பதிவு செய்துள்ளார்கள் மது நீலகண்டன் மற்றும் சண்முகசுந்தரம்.

தேசிய விருது பெற்ற இயக்குநர் மணிகண்டன் எப்போதும் தனக்கான ஒரு தனியான மிகச் சிறப்பாக கதையை கையாண்டு, ஒவ்வொரு காட்சியையும் உயிரோட்டமாக உருவாக்கியுள்ளார். மதுரை, ஒட்டன்சத்திரம், கேரளா என்று பயணம் செய்து, அதனை சார்ந்த பகுதிகளில் ஆங்காங்கே சுவாரஸ்ய நிகழ்ச்சிகளைப் புகுத்தி  இந்தத் தொடரை சற்றும் சலிப்பும் அலுப்பும் இல்லாதபடியான காட்சிகளை உருவாக்கி வெற்றி பெற்று இருக்கிறார் இயக்குனர்.

மொத்தம் பத்து பாகங்களைக் கொண்ட இந்த இணையத் தொடர், ஜியோ ஹாட்ஸ்டார் இணையதளத்தில் காணலாம்.

மொத்தத்தில், ‘முத்து என்கிற காட்டான்’ அனைவரும் ரசிக்க கூடிய தொடர்.

ரேட்டிங் 3/5.