‘ஹேப்பி ராஜ்’ திரைப்பட விமர்சனம்!

சென்னை:

பியாண்ட் பிக்சர்ஸ் சார்பில் ஜெயவர்தன் தயாரித்திருக்கும் ஹேப்பி ராஜ் படத்தை எழுதி இயக்கி யிருக்கிறார் மரியா ராஜா இளஞ்செழியன். இப்படத்தில் ஜி.வி. பிரகாஷ் குமார், ஜார்ஜ் மரியான், ஸ்ரீ கௌரி பிரியா, அப்பாஸ், கீதா கைலாசம், அதிர்ச்சி அருண், மதுரை முத்து, மகேஷ் தேவி, பிரார்த்தனா நாதன், பிரேம்ஜி அமரன் மற்றும் பலர்  நடித்துள்ளனர்.

திருநெல்வேலிக்கு அருகிலுள்ள ஒரு கிராமத்தில் பள்ளி ஆசிரியராகப் பணியாற்றுபவர் ஜார்ஜ் மரியன). அவரின் உடல்வாகு மற்றும் செயல்பாடுகளை குறை சொல்லி ‘குதிரை முட்டை” என்று ஊர் அறிய அனைவரும் கேலியும், கிண்டலும்  செய்கின்றனர். தனது உடலமைப்பு மற்றவர்கள் கேலி செய்யும் விதத்தில் இருந்தாலும் தன் மகன் ஜி.வி.பிரகாஷ், அழகாக இருப்பதை நினைத்து மகிழ்ச்சியடையும் ஜார்ஜ் மரியன், அவரை தீராத பாசத்துடன் வளர்கிறார். உருவ கேலிக்கு ஆளாகும் தன் தந்தையால் தனக்கு அவமானம் ஏற்படுவதாக கருதும், ஜி.வி.பிரகாஷ், அவரை விட்டு விலகி, வேறு எங்காவது சென்று மறைந்து வாழ விரும்புகிறார்.

இந்த சூழலில் பெங்களூரில் ஒரு கார்ப்பரேட் கம்பெனியில் வேலைக்குச் சேரும் ஜி.வி.பிரகாஷ், அங்கு தனது பெயரையும் தோற்றத்தையும் மாற்றிக்கொண்டு ‘ஹேப்பி ராஜ்” என்று சந்தோஷமாக வலம் வருகிறார். அங்கு அவருக்கு டீம் லீடராக இருக்கும் ஸ்ரீ கௌரி பிரியா மீது காதல் ஏற்படுகிறது. பணக்காரரான ஸ்ரீ கெளரி பிரியாவின் தந்தை அப்பாஸ், மகள் காதலுக்கு பச்சைக்கொடி காட்டுகிறார். இருவருக்கும் திருமண ஏற்பாடுகள் தொடங்கும் போது ஜி.வி.பிரகாஷின் தந்தை ஜார்ஜ் மரியனின் எளிமையான தோற்றம் மற்றும் கஞ்சத்தனமும், எதார்த்தமான கிராமத்து பேச்சுடன் அவர் செய்யும்  செயல்களை பார்த்து கோபமடையும் அப்பாஸ், அவரை அவமானப்படுத்தும் வகையில் பேசி விடுகிறார். இதனால், இருவருக்கும் இடையே மோதல் ஏற்பட்டு திருமணம் நின்று விடுகிறது. தந்தை  ஜார்ஜ் மரியானாலேயே ஜீ.வி.பிரகாஷின் காதல் திருமணம் தடைபடுவதால், அதன்பின் அந்தத் திருமணத்தை எப்படியாவது நடத்திவிட வேண்டும் என்று போராடுகிறார் ஜி.வி.பிரகாஷ்.  அந்தப் போராட்டத்தில் ஜி.வி.பிரகாஷ் வெற்றி பெற்றாரா? இல்லையா? என்பதை சொல்லி இருக்கும் படம்தான்  ‘ஹேப்பி ராஜ்’.

இப்படத்தில் கதாநாயகனாக நடித்திருக்கும் ஜி.வி.பிரகாஷ் நடனம், உடை, உருவம் என அனைத்திலும் வித்தியாசத்தை காட்டியிருந்தாலும்,  இதுபோன்ற கதாபாத்திரம் அவருக்கு பழக்கப்பட்டது என்றாலும், அப்பா மீதான கோபம் மற்றும் அன்பை வெளிக்காட்டும் காட்சிகளில் உணர்வுப்பூர்வமாக நடித்து அசத்தியிருக்கிறார்.  அப்பா பாசத்தில் தவிக்கும் மகனாக அவருடைய நடிப்பு சிறப்பு. அவர் கண்ணீர் விடும்போது நம் கண்களையும் கலங்க வைத்திருக்கிறார்.

கதாநாயகியாக ஸ்ரீ கெளரி பிரியா நடித்திருக்கிறார். ஒரு கதாநாயகிக்கு என்னென்ன வேலையெல்லாம் இருக்குமோ அவை எல்லாம்  இந்தப்படத்தில் ஸ்ரீகெளரிபிரியாவுக்குக் கொடுக்கப்பட்டிருக்கிறது. அந்த வேலையைச் சரியாகச் செய்து அனைவரையும் ரசிக்க வைத்து இருக்கிறார்.

இந்த படத்தின் மிகப்பெரிய பலம் ஜார்ஜ் மரியான் அவர்களின் அற்புதமான நடிப்பு. அப்பாவியாகவும், அதே நேரத்தில் மகனின் மீது அளவற்ற பாசம் கொண்ட தந்தையாகவும் அவர் உயிரோட்டமான நடிப்பை வழங்கியுள்ளார். .அவரும் ஏற்றுக் கொண்ட வேடத்துக்கு ஏற்ப நடித்திருக்கிறார். அப்பாஸுக்கு அவர் பாடம் புகட்டும் காட்சியில் கைதட்டல் பெறுகிறார்.

நாயகியின் தந்தையாக நடித்திருக்கிறார் அப்பாஸ்.நீண்ட இடைவெளிக்குப் பிறகு வந்திருக்கும் அவர், அவருடைய முந்தைய பிம்பத்துக்கேற்ற வேடத்தை ஏற்று இய்ல்பாக நடித்திருக்கிறார்.

நாயகனின் அம்மாவாக கீதா கைலாசம் நடித்திருக்கிறார். வழக்கமான கதாபாத்திரத்தில் நடித்தாலும் சில வழக்கத்திற்கு மாறான காட்சிகளில் நடித்து அலப்பறை செய்திருக்கிறார்.

மதுரை முத்து,அதிர்ச்சி மதன் ஆகியோருக்கு ரசிகர்களைச் சிரிக்க வைக்கும் பொறுப்பு கொடுக்கப்பட்டிருக்கிறது.

கதாநாயகியின் அம்மாவாக நடித்திருக்கும் தேவி மகேஷ், ஜி.வி.பிரகாஷின் கல்லூரிக் காதலி பிரார்த்தனா நாதன் ஆகியோரும் அளவாக நடித்து படத்திற்கு பலம் சேர்த்திருக்கிறார்கள்.

இசையமைப்பாளர் ஜஸ்டின் பிரபாகரன் வழங்கியுள்ள பாடல்கள் கதையின் ஓட்டத்துடன் இணைந்து இனிமையாக அமைந்துள்ளன. பின்னணி இசையும் காட்சிகளின் உணர்ச்சிகளை உயர்த்துகிறது.

ஒளிப்பதிவாளர் மதன் கிரிஸ்டோபர், கிராமப்புற மற்றும் நகரப்புற காட்சிகளை கண்கவர் வகையில் ஒளிப்பதிவு செய்துள்ளார்.

அப்பா மகன் பாசத்தைச் சொல்லும் நிறையப்படங்கள் வந்திருக்கின்றன.அவற்றிலிருந்து மாறுபட்ட அப்பா மகன் உறவைச் சொல்லி அதன்மூலம் இன்றைய இளைஞர்கள் ரசிக்கும் விதத்தில் இப்படத்தை மிக தெளிவான திரைக்கதை அமைத்து இயக்கி இருக்கிறார் இயக்குநர் மரியா ராஜா இளஞ்செழியன்,  முதல் பாதியில் நகைச்சுவை என்ற பெயரில் வரும் சில காட்சிகள் சலிப்பை ஏற்படுத்தினாலும் அனைத்து தரப்பினரும் கொண்டாடும் ஒரு முழுமையான பொழுதுபோக்கு படமாக கொடுத்திருப்பதை பாராட்டலாம்.

மொத்தத்தில், ’ஹேப்பி ராஜ்’   குடும்பத்துடன் சேர்ந்து பார்க்க வேண்டிய படம்.

ரேட்டிங் 3/5.