‘டிஎன் 2026’ – திரைப்பட விமர்சனம்!

சென்னை:

நட்டி நட்ராஜ், சிருத்தா ராவ், சாந்தினி தமிழரசன், யாஷிகா ஆனந்த் ,எம். எஸ். பாஸ்கர், இளவரசு, தம்பி ராமையா, ரெடின் கிங்ஸ்லி, லொள்ளு சபா மாறன், பிக்பாஸ் முத்துக்குமரன், ஆதித்யா கதிர், சித்ரா லட்சுமணன், தலைவாசல் விஜய், வையாபுரி, விஜி சந்திரசேகர், ஸ்ரீஜா ரவி, இந்திரஜா ரோபோ சங்கர் ஆகியோர் நடித்துள்ள படம்தான் ” TN 2026″ 

கதை திரைக்கதை எழுதி இருக்கும் தம்பி ராமையா, தனது மகன் உமாபதி ராமையாவை இப்படத்தின் மூலம்  இயக்குனராக்கியுள்ளார்.

நடிகர்கள் நாடாள ஆசைப்படுவது குறித்த ஆதரவு மற்றும் எதிர்மறை விமர்சனங்கள் ஆகியனவற்றை உள்ளடக்கமாகக் கொண்டு வெளியாகியிருக்கும் படம் ‘டிஎன் 2026’.

வட மாநிலத்தை சேர்ந்த நட்டி நட்ராஜ், சென்னைக்கு பிழைப்புக்காக வந்து குல்கந்த்  கலந்த பீடா கடை வைத்திருந்ததால், அவரை குல்கந்த் குமார் என்று அனைவரும் அழைக்கின்றனர்.  அப்போது அவருக்கு சினிமாவில் வாய்ப்பு கிடைத்து நடிகராகி விடுகிறார் நட்டி நட்ராஜ். அவர் நடித்த  முதல் படம் மக்களிடம் பெரிய அளவில் வரவேற்பு பெறுவதால், மக்கள் மனதில் அடுத்த எம்.ஜி.ஆர் என்ற இடத்தை பெற்று விடுகிறார். பொள்ளாச்சியில் மிகுந்த செல்வாக்குள்ள பெரிய  ஜமீன்தாராக இருக்கும் சிவலிங்கம் என்ற  தம்பி ராமையா, குல்கந்த் குமார் என்ற நட்டி நடித்த முதல் படத்தை பார்த்து  நல்லதொரு நடிப்பை வெளிப்படுத்திய அவரை நேரில் அழைத்து பாராட்டுகிறார் தம்பி ராமையா. வரும் எதிர்காலத்தில் எம் ஜி ஆர் போன்று மிகப்பெரும் இடத்திற்கு செல்லவும் ஆசிர்வதிக்கிறார். தம்பி ராமையாவுக்கு அவரை மிகவும் பிடித்துப் போனதால் நட்புக் கொண்டு அவரை வளர்ந்து வரும் நிலையில் அவரை ஊக்கப்படுத்தி கோல்டன் ஸ்டார் என்று பட்டம் கொடுத்து நட்டி நட்ராஜை பெரிய ஆளாக்குகிறார்.

நட்டி எம்.ஜி.ஆர் இடத்தை பிடிப்பார் என்பதை கணிப்பதோடு, அவருக்கான அனைத்து உதவிகளையும் செய்து கொடுத்து சினிமாவில் அவரை உச்ச நடிகராக்கும் பயணத்திலும் தன்னை ஈடுபடுத்திக் கொள்கிறார். ஆரம்பத்தில் ஒரு ஏழ்மையான மனிதராகத் தோன்றும் குல்கந்த் குமார்  பணக்கார ஜமீன்தாரான தம்பி ராமையாவின் ஆதரவால் புகழின் உச்சிக்குச் சென்று உச்ச நடிகராக வலம் வருகிறார். 200 கோடி சம்பளம் வாங்கும் பெரிய நடிகராக மாறிய நட்டி  என்ற குல்கந்த் குமாருக்கு மக்கள் மத்தியில் பெரிய ஆதரவு இருப்பதால் ஒரு அரசியல் கட்சியை தொடங்க திட்டமிடுகிறார். புதிய அரசியல் கட்சியை தொடங்க இருக்கும் நட்டி  என்ற குல்கந்த் குமாருடன் இணைந்து தம்பி ராமையா ‘ஆத்திக நாத்திக முன்னேற்ற கழகம்’ என்கிற பெயரில் கட்சி தொடங்க வைக்கிறார். 2026 ஆம் ஆண்டு அவர் தான் தமிழகத்தின் முதல்வர், என்ற நம்பிக்கையையும் அவரது மனதில் பதிய வைத்து அரசியலில் பயணிக்க வைக்கிறார் தம்பி ராமையா. இறுதியில் அவர் அரசியல் களத்தில் இறங்கி வெற்றி பெற்று முதல்வர் ஆனாரா? இல்லையா? என்பதுதான் “டி.என்.2026” படத்தின் மீதிக் கதை.

வட இந்தியா மத்தியப் பிரதேசத்தில் இருந்து இங்கு வந்து அறிமுகமாகி வளரும் நடிகராக குல்கந்த் குமாராக நட்டி நடித்துள்ளார். நடிகர் விஜய்யை நினைவுபடுத்தும் தோற்றம் ரஜினியை போல அவரது ஸ்டைலை  நினைவுபடுத்தும் நடிப்பு ஆகியனவற்றோடு அந்தக் கதாபாத்திரத்திற்கு ஏற்றவாறு, அந்த கதாபாத்திரத்திற்கு பொருத்தமாக நடித்து படத்துக்குப் பலம் சேர்த்திருக்கிறார் நட்டி. இப்படத்திற்கு அவரது நடிப்பு மற்றும் உடல்மொழி அனைத்தும் அவரது கதாபாத்திரத்திற்கு நியாயம் சேர்த்திருக்கிறது என்றுதான் சொல்ல வேண்டும்.

ஜமீன்தார்  சிவலிங்கம் மன்றாடியார் என்ற கதாபாத்திரத்தில்  நடித்திருக்கும் தம்பி ராமையா. ஜமீனாக இருந்தாலும், குல்கந்த் குமார் நட்டியின்  சேவகனாக, அரசியல் வழிகாட்டியாக பயணிக்கும் அவரது தோற்றம் மற்றும் கெட்டப், உச்ச நடிகர் ஒருவரது ரசிகர் மன்ற தலைவரை நினைவுப் படுத்து கிறது. அவரே கதை திரைக்கதை வசனம் எழுதி உருவாக்கி இருப்பதால் அதற்கான இடங்களை அவரே தேர்வு செய்து ஒவ்வொரு சின்ன அசைவிலும் தன் கதாபாத்திரத்தை உணர்ந்து வெறும் நக்கல் நையாண்டி என்றில்லாமல் சரியாகவும் அவர் நடித்துள்ளார்.

எம் எஸ் பாஸ்கர், இளவரசு, ரெடின் கிங்ஸ்லி  ஆகியோர் தங்கள் பங்கிற்கு அரசியல் நைய்யாண்டி செய்து அனைவரையும் சிரிக்க வைக்கின்றனர்.

கதாநாயகியாக நடித்திருக்கும் ஷெரிட்டா ராவ், சாந்தினி தமிழரசன், யாஷிகா ஆனந்த் ஆகியோர் திரைக்கதை ஓட்டத்திற்கு ஏற்றவாறு பயன்படுத்தபட்டிருக்கிறார்கள்.

பல்வேறு காலகட்டங்களைக் கொண்ட கதைக்கேற்ப ஒளியமைப்புகளை வடிவமைத்து மிக சிறப்பாக ஒளிப்பதிவாளர் பி.ஜி.முத்தையா ஒளிப்பதிவு செய்திருக்கிறார்.

தர்புகா சிவாவின் இசையில் பாடல்கள் அனைத்தும் கேட்கும் ரகம். பின்னணி இசை காட்சிகளுக்கு ஏற்ப பயணித்து இந்தக்  கதைக்களத்திற்கு பலம் சேர்த்திருக்கிறது.

ஒரு நடிகன் எப்படி உருவாகி வெற்றி பெறுகிறான் என்பதையும்,  அரசியலில் புகுந்து அவன் கடந்து வரும் பாதையையும் படத்தில் அழகாகவும் நகைச்சுவையாகவும் சித்தரித்து காட்டி இருக்கிறார் இயக்குனர் தம்பி ராமையாவின் மகன் உமாபதி ராமையா.  அரசியலுக்கு வருகிற நடிகர்களின் எண்ணங்கள்,அதற்கான பின்னணி என்ன என்பதையும் அரசியல் ஆசையில் வலம் வந்துக் கொண்டிருக்கிற சினிமா நட்சத்திரங்களை நையாண்டி செய்து மிக தெளிவாக திரைக்கதை அமைத்து இப்படத்தை இயக்கி வெற்றி பெற்றிருக்கிறார்.

மொத்தத்தில், ’TN 2026’ அரசியல் காமெடி கலக்கல்.

ரேட்டிங் 4/5.