லெஜெண்ட் சரவணன், ஷாம்,ஆண்ட்ரியா ஜெர்மையா சந்தோஷ் பிரதாப், பாயல் ராஜ்புட், லால்,பாகுபலி பிரபாகரன், அமிர்தா ஐயர், வீ டிவி கணேஷ், இயல், ஐஸ்வர்யா பாஸ்கரன் ,ஜார்ஜ் மரியான், அறந்தாங்கி நிஷா, படவா கோபி, ஆதித்யா கதிர், ஜெயஸ்மித்ரா, ஷர்மிதா சாம், யோகிராம், ஓஏகே சுந்தர், மகாநதி சங்கர் ,வேல் அருணாச்சலம், நிரஞ்சன் மோசஸ் , ஷோபன் பாபு ,அசோக் பாண்டியன் நடித்துள்ள படம்தான் “லீடர்”
லெஜண்ட் சரவணா ஸ்டோர்ஸ் புரொடக்ஷன்ஸ் தயாரித்திருக்கும் இப்படத்தை எழுதி இயக்கியிருக்கிறார் ஆர்.எஸ்.துரை செந்தில்குமார்.
தூத்துக்குடியில் வாழ்ந்து வரும் சக்திவேல் என்கிற பெயர் கொண்ட லெஜென்ட் சரவணன். விடிவி கணேஷ் கார் பழுது பார்க்கும் மையத்தில் கார் மெக்கானிக்காக வேலை பார்க்கிறார். அவருக்கு ஒரு மகள் உண்டு, மனைவி இல்லை .தனது மகள் மீது அதிக பாசம் வைத்து அவள்தான் தனது உலகமாக நினைத்து வாழ்ந்து வருகிறார். இந்த சூழலில் . தூத்துக்குடி துறைமுகத்துக்கு வரும் கார்களை பழுது பார்ப்பது இவருக்கு முக்கியமான வேலையாக இருக்கிறது. போலீசாக இருக்கும் ஆண்ட்ரியா துறைமுகத்தில் இருக்கும் ஒரு கன்டெய்னரில் மர்மமான பொருள் ஏதோ ஒன்று இருக்கிறது என்பதை அறிந்து அதை மேலிட போலீஸ் அதிகாரிகளிடத்தில் சொல்கிறார். ஆனால், விஷயம் பெரிது என்பதால் மேல் அதிகாரிகள் யாரும் இதில் தலையிட வேண்டாம் என்கின்றனர். அந்த குற்றக் கும்பலை வெளிச்சத்திற்குக் கொண்டு வரப் போராடும் ஆண்ட்ரிய, துறைமுகத்தோடு உள்ளவர்களோடு அதிகமாகப் பழக்கம் வைத்துள்ள லெஜெண்ட் சரவணனிடம் உதவி கேட்கிறார். ஆனால் அவருக்கு உதவி செய்ய மறுக்கிறார் லெஜென்ட் சரவணன்.
தூத்துக்குடி துறைமுகத்தில் கண்டெய்னர் மூலமாக பல தடை செய்யப்பட்ட பொருட்களையும், போதை மருந்துகளையும் கடத்தி பெரும் பணம் பார்த்து வருகிறது ஒரு சர்வதேச கும்பல். அந்தக் கும்பலின் லோக்கல் தலைவனாக இருப்பவர் பாகுபலி பிரபாகரன். இவருக்கு அடுத்து என்னென்ன செய்ய வேண்டும் என்று ஆணை பிறப்பிப்பது மெயின் வில்லனான சந்தோஷ் பிரதாப். இந்த நேரத்தில் தூத்துக்குடியின் புதிய எஸ்பியாக பதவி ஏற்கிறார் ஷாம். இந்த நேரத்தில் தூத்துக்குடி துறைமுகத்தில் அம்மோனியம் நைட்ரேட் வெடி மருந்து உள்ள கண்டெய்னரை ஷாம் கைப்பற்றி போலீஸ் ஸ்டேஷனில் வைக்கிறார். இப்போது போலீஸ் ஸ்டேஷனில் இருக்கும் அந்தக் கண்டெய்னரை கடத்துவதற்கு ஒரு திட்டம் தீட்டுகிறார் ஆண்ட்ரியா.
அதற்கு ஏற்றவாறு லெஜெண்ட் சரவணனின் மகளை கடத்தி வந்து ஒளித்து வைத்துவிட்டு, அவளை பாகுபலி பிரபாகர்தான் கடத்தி இருக்கிறார் என்ற ஒரு பொய்யை சொல்லி லெஜெண்ட் சரவணனை தூண்டிவிட்டு அந்த கண்டெய்னரை வெளியில் எடுக்க வைக்கிறார் ஆண்ட்ரியா. இன்னொரு பக்கம் ஷாம் கடத்தலுக்கு உள்ளாகும் அந்த கண்டெய்னரை மீட்க பெரும் முயற்சி செய்கிறார். சாதாராண கார் மெக்கானிக்கான லெஜண்ட் சரவணனின் அதிரடி நடவடிக்கையால் சந்தேகம் அடையும் காவல்துறை உயர் அதிகாரியான ஷாம், அவரைப் பற்றி மேற்கொள்ளும் ரகசிய விசாரணையில், திட்டமிட்டு காவல்துறையை பயன்படுத்தி பாகுபலி பிரபாகரனை லெஜண்ட் சரவணன் அழித்திருப்பதை அறிந்துக் கொள்கிறார். இதையடுத்து ஷாம், மேற்கொள்ளும் தொடர் விசாரணையில் லெஜண்ட் சரவணன் பற்றிய பல உண்மைகள் தெரிய வருகிறது. அப்படியென்றால் லெஜண்ட் சரவணன் யார்? அவருக்கும் கடத்த்ல் கும்பலுக்கும் என்ன சம்பந்தம்? என்பதை அதிரடி, அமர்க்களமான ஆக்ஷன் காட்சிகளுடன் வெளி வந்திருக்கும் படம்தான் “லீடர்”.
நாயகனாக நடித்திருக்கும் லெஜண்ட் சரவணன், இரண்டாவது படத்திலேயே அதிரடி ஆக்ஷன் ஹீரோவாக உருவெடுத்து அனைவரையும் வியக்க வைத்திருக்கிறார். தன் மகளுடன் இணைந்த உணர்ச்சி காட்சிகளில் அவர் காட்டும் ஈடுபாடு கவனிக்கத்தக்கது. அவர் எதிரிகளை அடித்துத் துவம்சம் செய்யும் இடத்தில் சாது மிரண்டால் காடு கொள்ளாது என்று ஒரு மக்கள் நாயகனாக அதாவது மாஸ் ஹீரோவாக வெளிப்படுகிறார்,
நாயகனின் மனைவியாக நடித்திருக்கும் பாயல் ராஜ்புத்துக்கு, மகளைப் பெற்றெடுத்துவிட்டு காணாமல் போகிற சிறிய கதாபாத்திரம் என்றாலும் அதிலும் தன் இருப்பைப் பதிவு செய்திருக்கிறார்.
போலீஸ் இன்ஸ்பெக்டராக நடித்திருக்கும் ஆண்ட்ரியா ஜெர்மையா, போலீஸ் உயர் அதிகாரியாக நடித்திருக்கும் ஷாம் இருவரும் தங்களுக்கு கொடுக்கப்பட்ட கதாபாத்திரத்திற்குகேற்ற பங்களிப்பை முழுவதும் கொடுத்து மிக சிறப்பாக நடித்திருக்கின்றனர்.
வில்லத்தனம் கொண்ட கார்ப்பரேட் தோற்றத்தில் வரும் சந்தோஷ் பிரதாப் பல்வேறு முகம் காட்டித் தனது வில்லத்தனத்தை வெளிப்படுத்தி இருக்கிறார்.
லால், விடிவி கணேஷ், பாகுபலி பிரபாகரன் மற்றும் பேபி இயல், அமிர்தா ஐயர், ஐஸ்வர்யா பாஸ்கரன், ஜார்ஜ் மரியன், அறந்தாங்கி நிஷா ஆகியோர் தங்களுக்குக் கொடுக்கப்பட்ட கதாபாத்திரங்களை நிறைவாகச் செய்துள்ளனர்.
ஜிப்ரானின் இசையில் பாடல்கள் அனைத்துமே கேட்கும் ரகம்தான். இதையும் தாண்டி பின்னணி இசையில் கலக்கி இருக்கிறார்.
ஒளிப்பதிவாளர் எஸ்.வெங்கடேஷ் இந்தப் படத்தை முதலிலிருந்து கடைசிவரையிலும் எந்த அளவுக்கு அசத்தலாக காட்ட முடியுமோ அப்படி காட்டியிருக்கிறார். சண்டை காட்சிகள் அனைத்திலுமே அனல் பறக்கிறது.
எதிர் நீச்சல், கொடி, கருடன் போன்ற வெற்றிப் படங்களை இயக்கிய துரை செந்தில்குமார், தூத்துக்குடியில் ஆரம்பிக்கும் கதையை, இந்தியாவை கடந்து, சர்வதேச அளவில் விவரித்த விதம் ரசிகர்களின் கவனம் சிதறாமல் படத்துடன் பயணிக்க வைக்கிறார். ஒரு அப்பாவியான அப்பாவும் மகளும்,மிகவும் சந்தோசமாக வாழ்ந்து கொண்டிருக்கும்போது, திடீரென்று அவர்களின் வாழ்க்கையில் மிகப்பெரிய கேங்ஸ்டர் கும்பல் நுழைந்தால் எப்படி இருக்கும் என்பதை ஆக்ரோஷமாக ஆக்ஷன் படத்தை அட்டகாசமாக காட்சிபடுத்தி ஆச்சரியபட வைத்து இருக்கிறார்.
மொத்தத்தில் லெஜண்ட் சரவணா ஸ்டோர்ஸ் புரொடக்ஷன்ஸ் தயாரித்திருக்கும் ‘லீடர்’ – அதிரடி ஆக்ஷன்’ ரசிகர்களுக்கு விருந்து.
ரேட்டிங் 4/5.