சதீஷ், சுரேஷ் ரவி, மோனிகா சின்னகோட்லா, மானசா சௌத்ரி, கருணாகரன், புகழ், ஜாவா சுந்தரேசன், லிவிங்ஸ்டன், உமா, சூப்பர் குட் சுப்பிரமணி, பாவெல் நவகீதன், ஐஸ்வர்யா தத்தா, விஜே பார்வதி, விஜே மகேஸ்வரி, மற்றும் சாணக்யன் உள்ளிட்ட பலர் நடித்திருக்கும் படம்தான் “முஸ்தபா முஸ்தபா”. இப்படத்தை பிரவீன் சரவணன் எழுதி இயக்கி இருக்கிறார்.
இதுவரையில் பல படங்களில் நகைச்சுவை கதாபாத்திரங்களில் வலம் வந்து கொண்டிருந்த சதீஷ் இதில் கதாநாயகன் என்கிற சொல்லும் படியான கதாபாத்திரத்தில் நடித்துள்ளார். தனியார் தொலைக்காட்சி சேனல் ஒன்றில் பணியாற்றும் நாயகன் சதீஷும், டாக்டரான நாயகி மோனிகா சின்னகொட்லாவும் காதலிக்கிறார்கள். இவர்களது காதலுக்கு இரு வீட்டாரும் பச்சைக்கொடி காட்ட, திருமண ஏற்பாடுகள் விறுவிறுப்பாக நடக்கின்றன. திருமணத்திற்குச் சில தினங்களே உள்ள நிலையில், சதீஷ் வேறு ஒரு பெண்ணுடன் நெருக்கமாக இருக்கும் அந்தரங்க வீடியோ ஒன்று இணையத்தில் வெளியாகிறது. இந்த வீடியோ சமூக வலைத்தளங்களில் பரவினால் சதீஷின் திருமண வாழ்க்கை மட்டுமன்றி, அவரது நல்ல பெயரும் சிதைந்துவிடும் என்ற சூழல் உருவாகிறது. இதனால் தனது திருமணத்திற்கு தடை வந்துவிடும் என்ற எண்ணத்தில் அந்த அந்தரங்க வீடியோவை இணையத்தில் இருந்து அழிப்பதற்காக போராடுகிறார். அந்தப் போராட்டத்தில் சதிஷ் வெற்றி பெற்றாரா? இல்லையா? என்பதுதான் ‘முஸ்தபா முஸ்தபா’ படத்தின் மீதிக் கதை.
காமெடி கதாநாயகன் சதீஷ் மீண்டுமொரு ஒரு காமெடி கதை களத்தில் தோன்றி நடித்து இருக்கிறார். கதாபாத்திரத்திற்கு ஏற்ற நடிப்பை கொடுத்திருந்தாலும் ஆங்காங்கே தனது காமெடியில் எந்த ஒரு முன்னேற்றமும் இல்லாமல் மிகவும் சோர்வை கொடுத்து இருக்கிறார். நம்மிடம் நகைச்சுவை யைத்தான் மக்கள் எதிர்பார்ப்பார்கள் என்பதை உணர்ந்து அதற்கேற்ப நடித்திருக்கிறார்.
சதீஷின் நண்பராக, படத்தின் மற்றொரு கதாநாயகனாக நடித்திருக்கும் சுரேஷ் ரவி, தனது பணியை குறையின்றி செய்திருக்கிறார்.
சதீஷ்,சுரேஷ்ரவி ஆகியோரின் நண்பராக நடித்திருக்கும் கருணாகரன், மக்கள் எதிர்பார்ப்பதைப் பூர்த்தி செய்து முக்கியமான திருப்புமுனை கதாபாத்திரத்தில் நடித்து கவனம் ஈர்த்து இருக்கிறார்.
சதீஷுக்கு இணையராக நடித்திருக்கும் மோனிகா சின்னகொட்லா, சுரேஷ்ரவிக்கு இணையராக நடித்திருக்கும் மானசா செளத்ரி ஆகியோருக்குப் பெரிய அளவில் நடிப்பதற்கு வாய்ப்பு இல்லை என்றாலும் வருகிற இடங்களில் நிறைவாகச் செய்து வரவேற்புப் பெறுகிறார்கள்.
சின்னத்திரையில் இருந்து வெள்ளித்திரைக்கு வந்திருக்கும் புகழ், காமெடிக்கு இன்னும் அதிகமான உழைப்பை கொடுக்க வேண்டும் என்ற எண்ணம் இருந்தாலும் துளி அளவு கூட சிரிப்பை கொண்டு வர அவரால் முடியவில்லை.
சாம்ஸ், லிவிங்ஸ்டன், உமா, புகழ், சூப்பர் குட் சுப்பிரமணி என மற்ற துணை கதாபாத்திரங்களில் நடித்திருப்பவர்கள் சில இடங்களில் சிரிக்க வைக்கிறார்கள்.
ஒளிப்பதிவாளர் கே.எஸ்.விஷ்ணு ஸ்ரீ படம் முழுவதையும் வண்ணமயமாக் காட்சிப்படுத்தியிருக்கிறார்.
இசையமைப்பாளர் எம்.எஸ்.ஜோன்ஸ் ரூபர்ட்டின் இசையில் பாடல்கள் அனைத்தும் கேட்கும் அம்சங்களோடு உள்ளன.பின்னணி இசை காட்சிகளுக்கு ஏற்ப பயணித்திருக்கிறது.
எழுதி இயக்கியிருக்கிறார் பிரவீன் சரவணன். அந்தரங்க வீடியோ ஒன்றை வைத்துக் கொண்டு இரண்டு மணி நேரம் பார்வையாளர்களை மகிழ்விக்கும் விதத்தில் படத்தை இயக்கி இருந்தாலும் இடைவேளைக்குப் பிறகு சற்று சலிப்படைய வைத்து விடுகிறார். ஒரு நகைச்சுவைப் படத்தைக் கொடுக்கும் சவாலான முயற்சியில் இறங்கியிருந்தாலும் அதில் பாதி வெற்றி பெற்றிருக்கிறார்.
மொத்தத்தில், ‘முஸ்தபா முஸ்தபா’ காமெடியில் சிரிக்க முடியவில்லை.
ரேட்டிங் 3/5.