அண்மைக்காலமாக முக்கோணக் காதல்கதைகள் வருவதில்லை.அந்தக் குறையைப் போக்கும் வண்னம் வந்திருக்கும் படம் ‘காதல் ரீசெட் ரிபீட்’. இப்படத்தில் மதும்கேஷ், ஜியா சங்கர், அர்ஜுன் அசோகன், எம் எஸ் பாஸ்கர் மற்றும் பலர் நடித்துள்ளனர். இயக்குனர் ஏ.எல் .விஜய் இயக்கியுள்ளார்.
கோத்தகிரியைச் சேர்ந்த தேயிலை எஸ்டேட் அதிபரின் மகள்தான் ஜியா சங்கர். சிறு வயதில் தாயை இழந்தவர்.தந்தையிடம் பாசத்துடன் வளர்ந்து வருகிறார். ஜியா சங்கர் பாடல் பாடுவதில் ஆர்வம் ஏற்பட்டு இசைக்குழு ஒன்றில் பாடகியாக வலம் வருகிறார். தனது இசைக் குழுவில் பாடல்கள் பாடி சர்வதேச புகழ் அடைய நினைக்கிறாள். அந்த இசை குழுவிலிருக்கும் அர்ஜுன் அசோகனை காதலிக்கிறார். இந்த சூழலில் ஸ்காட்லாந்தில் நடக்கும் ஒரு இசை போட்டியில் கலந்துக் கொள்ளச் சென்ற ஜியா சங்கர் தான் காதலித்த அர்ஜுன் அசோகன் வேறு ஒரு பெண்ணுடன் தொடர்பு இருப்பதைக் கண்டு மனம் வேதனையடைந்து தற்கொலை செய்ய முயலுகிறார். தற்கொலை செய்ய முயற்சி செய்தபோது தலையில் காயம் ஏற்பட்டு ஜியா சங்கர் மறதியால் பாதிக்கப்படுகிறார். தூங்கி எழுந்தால் முந்தைய நாளில் நடந்த அனைத்தையும் மறந்து விடும் நிலைக்கு சென்று விடுகிறார்.
ஜியா சங்கரை தூரத்தில் இருந்து பார்ப்பதையே தன் வாழ்வின் பாக்கியம் என்ற மனநிலையில் இருக்கும் நாயகன் மதும்கேஷ், அவரை ஒருதலையாக காதலிக்கிறார். அதனால் ஜியாசங்கரை பின் தொடர்ந்து சென்று தற்கொலை செய்ய முயன்றபோது மதும் கேஷ் அவரைக் காப்பாற்றி எம்.எஸ்.பாஸ்கர் வீட்டிற்கு அழைத்து வருகிறார். மதும்கேஷ் அவரை காப்பாற்றினாலும் ஜியா சங்கருக்கு நடந்தது எதுவும் ஞாபகம் இல்லாமல் இருப்பதால், தினமும் அவளிடம் தன்னை அவளது காதலனாக அறிமுகப்படுத்தி, அவளது வாழ்க்கையில் உறுதுணையாக இருந்து அவளை கவனித்து வருகிறான். இந்த சமயத்தில் ஜியாசங்கரிடம் நான்தான் உன் உண்மையான காதலன் என்று ஜியாசங்கருடன் இணைந்து எடுத்துக் கொண்ட புகைப்படங்களை காட்டுகிறார் அர்ஜுன் அசோகன் . இப்படிப்பட்ட சூழலில் யார் உண்மையான காதலன் என்று அறிய முடியாமல் தவிக்கிறார் ஜியாசங்கர். இறுதியில் உண்மையான காதலன் யார் என்பதை கண்டுபிடித்தாரா? இல்லையா? ‘காதல் ரீசெட் ரிப்பீட்’ படத்தின் மீதிக் கதை.
கதாநாயகனாக அறிமுகமாகியிருக்கும் மதுமகேஷுக்கு காதலுக்காக ஏங்கும் கதாபாத்திரம் என்றாலும் அதை உணர்ந்து கதாபாத்திரத்திற்கு என்ன தேவையோ அதை அளவாக கொடுத்து ரசிக்கும்படியாகவும் செய்திருக்கிறார்.
கதாநாயகியாக நடித்திருக்கும் ஜியா சங்கர், நல்ல புதுவரவு.அவருடைய அழகும் நடிப்பும் இந்தக்கதைக்கு மிகப் பொருத்தமாக அமைந்திருக்கின்றன.
இன்னொரு நாயகனான அர்ஜுன் அசோகனுக்கு முக்கியமான கதாபாத்திரம்.அதற்கு ஏற்றவாறு நன்றாக நடித்திருக்கிறார்.
சிறிய வேடம் என்றாலும் விஜி சந்திரசேகர், ஜெயப்பிரகாஷ், எம்.எஸ்.பாஸ்கர் ஆகியோரது அனுபவம் வாய்ந்த நடிப்பின் மூலம் படத்திற்கு பலம் சேர்த்திருக்கிறார்கள்.
இசையமைப்பாளர் ஹாரிஸ் ஜெயராஜ் இசையில் காதல் உணர்வுகளை மென்மையாக எடுத்துச் செல்லும் பாடல்களும் பின்னணி இசையும் மிக சிறந்த முறையில் அமைந்து படத்திற்கு பலம் சேர்த்திருக்கிறது.
அரவிந்த் கிருஷ்ணாவின் ஒளிப்பதிவில் ஸ்காட்லாந்த் நடக்கும் காதல் உணர்வுகளையும், ஒவ்வொரு காட்சியும் கதையின் உணர்வுகளையும் மிக அழகாக எடுத்து சென்று அழகாக படமாக்கி இருக்கிறார்.
இப்படத்தின் இயக்குனர் ஏ.எல். விஜய், ஒரு வெளிநாட்டு பின்புலத்தில் வித்தியாசமான கதையை படமாக உருவாக்கி பார்ப்பவர்களைத் திருப்திப்படுத்தும் வகையில் முக்கோண காதலை கலகலப்பாகவும் விறுவிறுப்பாகவும் இந்தப் படைப்பை உருவாக்கி பாராட்டு பெறுகிறார்.
மொத்தத்தில் ‘காதல் ரீசெட் ரிப்பீட்’ – இசையுடன் இணைந்த ஒரு காதல் படம்.
ரேட்டிங் 3/5.