பாவனா, ரஹ்மான், அர்ஜுன் லால், ஷெபின் பென்சன், விஷ்ணு அகஸ்தியா மற்றும் பலர் நடித்திருக்கும் படம்தான் ‘அனோமி’ இப்படத்தை ரியாஸ் மராத் எழுதி இயக்கியுள்ளார்.
சமூக விதிமுறைகள் பலவீனமாகி, தனிநபர்கள் சமூகத்தில் தங்களைக் கைவிடப்பட்டவர்களாக உணரும் ஒரு நிலையை அனோமி என்று குறிப்பிடுகிறார்கள்.
இந்தக்கதையின் நாயகி பாவனா, தடவியல் நிபுணரராக பணி புரிந்து வருகிறார். ஒரு விபத்தில் தனது தாய் மற்றும் தந்தையை இழந்துவிடுகிறார் பாவனா. பெற்றொரை இழந்ததால் தனது தம்பியான ஜியானை வளர்த்து வருகிறார் பாவனா. விபத்தில் உடன் இருந்ததால் மன ரீதியான ஒரு சில பிரச்சனைகள் ஜியானுக்கு இருப்பதால் அவரை எங்கேயும் வெளியே அனுப்பாமல் வளர்த்து வருகிறார் பாவனா. தற்கொலை செய்து கொண்ட வாலிபர் ஒருவரின் வழக்கை நேரில் சென்று தடயங்களை ஆராய்ந்து விட்டு, வீட்டிற்கு வரும் பாவனா, அங்கு தனது தம்பி ஜியான் இல்லாததைக் கண்டு அதிர்ச்சியடைந்து பல இடங்களில் தேடி அலைகிறார். மறுநாள், ஒரு இடத்தில் தம்பி ஜியான் இறந்து கிடக்கிறார். ஜியான் தற்கொலை செய்துக் கொண்டதால் என்ன செய்வதென்று தெரியாமல் பித்து பிடித்தவர் போல் ஆகிறார் பாவனா. இந்த கொலை வழக்கை கையில் எடுத்து விசாரிக்கிறார் இன்ஸ்பெக்டர் ரகுமான். இது தற்கொலை தான் என்று வழக்கை முடிக்க பார்க்கிறார் ரகுமான்.
ஆனால், தன் தம்பி தற்கொலை செய்துகொள்ள மாட்டான் என்று பிடிவாதமாக இருந்த பாவனா, ஒரு சில தடயங்களை வைத்து இது கொலை என்றும், இது தன்னுடைய தம்பியோடு நிற்காமல் ஒரு சைக்கோ கொலைகாரன் ஒருவன் தம்பியோடு சேர்த்து மேலும் இருவரையும் கொன்றிருப்பதாக நீதிபதியிடம் ஆதாரங்களோடு நிரூபிக்கிறார் பாவனா. இதனால் தனது விசாரணையை வேறு கோணத்திற்கு திருப்பிக் கொண்டு அதில் பயணிக்க ஆரம்பிக்கிறார் ரகுமான். மற்றொரு பக்கம் தனது தம்பியை கொலை செய்தவர் யார் என்று மற்றொரு கோணத்தில் விசாரணை நடத்தி வருகிறார் பாவனா. இந்த சூழலில் அந்த சைக்கோ கொலைகாரனை இன்ஸ்பெக்டர் ரகுமான் கண்டுபிடித்தாரா? அல்லது பாவனா கண்டுபிடித்தாரா? என்பதுதான் ‘அனோமி’ படத்தின் மீதிக் கதை.
தடவியல் நிபுணராக நடித்திருக்கும் பாவனா,அதற்கேற்றவாறு கதாபாத்திரத்தை உணர்ந்து மிக சிறப்பாக நடித்திருக்கிறார். கொலை நடந்த இடத்திலிருந்து ஒவ்வொரு மர்மங்களையும் மிக துல்லியமாக ஆராய்ந்து திரட்டும் தடயங்கள், அவற்றின் மூலம் கொலையாளியை அவர் நெருங்கும் விதம் ஆகிய எல்லா இடங்களிலும் மிகப் பொருத்தமாக நடித்து அந்த கதாபாத்திரத்துக்கும் படத்துக்கும் பலம் சேர்த்திருக்கிறார் பாவனா. ஒரு பொறுப்புள்ள சகோதரியாகவும், தடயவியலில் தீவிரமாகத் துப்பு துலக்கும்போது ஒரு அதிகாரியாகவும் தனது கதாபாத்திரத்தை முழுமை செய்திருக்கின்றார்.
காவல்துறை அதிகாரியாக நடித்திருக்கும் ரகுமானுக்கு, ஏற்கெனவே இதுபோன்ற கதாபாத்திரம் ஏற்று நடித்திருப்பதால் ஸ்வீட் சாப்பிடுவது போல. மிக அழகாகச் செய்து வரவேற்புப் பெறுகிறார்.
பாவனாவின் தம்பியாக நடித்திருக்கும் ஷெபின் பென்சன், காதலனாக நடித்திருக்கும் அர்ஜுன் லால், பினு பப்பு, விஷ்ணு அகஸ்தியா என மற்ற கதாபாத்திரங்களில் நடித்திருப்பவர்கள் அதை உணர்ந்து தங்களது பணியை செய்து இருக்கிறார்கள்.
ஒளிப்பதிவாளர் சுஜித் சாரங் ஒளிப்பதிவு இப்படத்திற்கு மிகப்பெரிய பலமாக அமைந்துள்ளது. திரைக்கதையில் சொல்லப்பட வேண்டிய செய்திகளைக் காட்சியில் சொல்ல நினைத்து வெற்றி பெற்றிருக்கிறார்.
ஹர்ஷவர்தன் ராமேஸ்வரின் இசையில் பாடல்கள் கதைக்களத்தை விவரிக்கும் விதத்தில் அமைந்திருக்கிறது. பின்னணி இசை அதிகம் சத்தம் இல்லாமல் நம்மை அசர வைத்திருக்கிறார்.
கதை எழுதி இயக்கியிருக்கிறார் ரியாஸ் மராத். இதுபோன்ற வித்தியாசமான கதைகளில் கொலைக்கான காரணம் என்ன என்பதை முற்றிலும் யோசித்து அதற்கேற்ப திரைக்கதையையும் அமைத்து வெற்றி பெற்றிருக்கிறார். இந்த படத்தில் மரணத்தைப் பற்றிய தேடுதலும், மரணம் பற்றி ஆராய்ச்சி போன்ற மனவியல் கோளாறுகள் பற்றி பேசப்பட்டுள்ளன.
மொத்தத்தில் ஒரு புலனாய்வுக் கதையான ‘அனோமி’ ரசிகர்களை ரசிக்க வைக்கும்.
ரேட்டிங் 3/5.