‘நிர்வாகம் பொறுப்பல்ல’ – திரைப்பட விமர்சனம்!

சென்னை:

கார்த்தீஸ்வரன், ஸ்ரீநிதி, ஆதவன், லிவிங்ஸ்டன், ப்ளாக் பாண்டி, மிருதுளா சுரேஷ், அகல்யா வெங்கடேசன் உள்ளிட்ட நட்சத்திரங்களின் நடிப்பில் உருவாகியுள்ள படம் தான் நிர்வாகம் பொறுப்பல்ல. கதை, திரைக்கதை, வசனம் எழுதி இயக்கியிருக்கிறார் கார்த்தீஸ்வரன்.

இப்படத்திற்கு இசையமைத்திருக்கிறார் ஸ்ரீகாந்த் தேவா. மேலும், ஒளிப்பதிவு செய்திருக்கிறார் என் எஸ் ராஜேஷ். ராதாகிருஷ்ணன் தயாரித்திருக்கிறார்.

கார்த்தீஸ்வரன், ஆதவன் உட்பட ஐவர் சேர்ந்து மக்களிடையே ஆன்லைன் மூலம் கொள்ளையடிப்பதை வழக்கமாக வைத்திருக்கின்றனர். ஆன் லைன் செக்ஸ் மோசடி, குறைந்த பணத்திற்கு அதிகமான வட்டி, 250 ரூபாய்க்கு மொபைல் போன் என பல விதங்களில் மக்களை ஏமாற்றி ஆசை காட்டி அவர்களிடம் இருந்து ஆயிரக்கணக்கான கோடி ரூபாயை கொள்ளையடிக்கிறது இந்த கும்பல். இந்த மோசடியில் சம்பாதித்த ரூ.5 ஆயிரம் கோடி பணத்துடன் வெளிநாட்டுக்கு தப்பிச் செல்ல முற்படும் தருணத்தில் அவர் போலீஸ் இன்ஸ்பெக்டர் ஸ்ரீநிதியின் கண்ணில் மாட்டிக் கொள்கிறார் கார்த்தீஸ்வரன்.  போலீஸ் இன்ஸ்பெக்டர் ஸ்ரீநிதியிட ம் சிக்கிக் கொண்ட கார்த்தீஸ்வரன் அதிலிருந்து தப்பித்தாரா? அவர் செய்த மோசடிகள் என்ன? என்பதுதான்   ‘நிர்வாகம் பொறுப்பல்ல’ படத்தின் மீதிக் கதை.

எஸ்.கார்த்தீஸ்வரன், கதாநாயகனாகவும் இயக்குநராகவும் இரட்டை பொறுப்பை ஏற்றிருக்கிறார். வெளிப்படையாக அப்பாவியான தோற்றம் கொண்ட அவரது கதாபாத்திரம், திரையில் வெளிப்படும் மோசடிகளில் அதிர்ச்சியை உருவாக்குகிறது.பல்வேறு மோசடிகள் செய்பவராக நடித்திருக்கும் கார்த்தீஸ்வரன்,அதற்கேற்ப பல்வேறு தோற்றங்களில் உலா வருகிறார்.

போலீஸ் இன்ஸ்பெக்டராக ஸ்ரீநிதி மிடுக்கான தோற்றத்துடன் கம்பீரமாக வலம் வந்து கவனிக்க வைத்துள்ளார்.

கார்த்தீஸ்வரனின் மோசடி குழு உறுப்பினராக நடித்திருக்கும் ஆதவன், லிவிங்ஸ்டன், பிளாக் பாண்டி, மிருதுலா சுரேஷ், அகல்யா வெங்கடேசன் என அனைவரும் கொடுத்த வேலையை குறையின்றி செய்திருக்கிறார்கள்.

ஒளிப்பதிவாளர் என்.எஸ்.ராஜேஷ், காட்சிகளை கலர்புல்லாகவும், தரமாகவும் படமாக்கியிருக்கிறார்.

ஸ்ரீகாந்த் தேவாவின் இசையில் பாடல்கள் ஆட்டம் போட வைக்கிறது. பின்னணி இசை அளவுக்கு அதிகமாக காதை கிழிக்கிறது.

ஆன்லைன் மூலம் பல வழிகளில், பலர் ஏமாற்றப்பட்டு வருவது தொடர்பாக செய்திகள் வெளியானாலும், மக்கள் ஏமாறுவதும், அவர்களை தொடர்ந்து ஏமாற்றுவதும் நடந்துக் கொண்டு தான் இருக்கிறது. இதற்கு காரணம் என்ன ? என்பதை கமர்ஷியலாக காட்சிப்படுத்தியிருக்கும் இயக்குநர்  எஸ்.கார்த்தீஸ்வரன், இத்தகைய மோசடிகளில் சிக்காமல் இருக்க மக்கள் என்ன செய்ய வேண்டும், என்பதையும் சொல்லியிருக்கிறார். கலகலப்புக்கும் பரபரப்புக்கும் பஞ்சம் இல்லாமல் சின்ன பட்ஜெட்டில் நல்லதொரு விழிப்புணர்வுப் படமாக உருவாக்கி கொடுத்து இருக்கிறார் இயக்குனர்.

மொத்தத்தில், ‘நிர்வாகம் பொறுப்பல்ல’  மோசடிகளில் சிக்காமல் இருக்க ஒரு படம்.

ரேட்டிங் 3/5