இயக்குனர் ஜெபி, இயக்குநர் மிஷ்கினிடம் உதவி இயக்குநராக இருந்தவர். அவரது இயக்கத்தில் டேனியல் பாலாஜி, கே பாக்யராஜ், அருள் தாஸ், தன்யா ரவிச்சந்திரன், தமிழ், நயனா, ஸ்வேதா டாரதி, ஜேக் அருணாச்சலம், ரங்கா உள்ளிட்ட நட்சத்திரங்களின் நடிப்பில் உருவாகி வெளிவந்திருக்கும் படம் தான் ”B P 180”.
அரசியல்வாதி பாக்யராஜின் மகள் எதிர்பாராத ஒரு விபத்தில் இறந்து விடுகிறார். பிரேத பரிசோதனை செய்ய வேண்டிய நிலை வருகிறது. அவரது உடலைப் போஸ்ட்மார்டம் செய்யாமல் தன்னிடம் கொடுக்க வேண்டுமென பாக்யராஜ் மருத்துவமனையில் கோருகிறார். பாசமாக வளர்த்த மகள் என்பதால்,அவரது உடலை அறுக்காமல் கொடுக்குமாறு அரசு மருத்துவரான தன்யாவிடம் கெஞ்சுகிறார் பாக்யராஜ். ஆனால், சட்டப்படி என்ன செய்ய வேண்டுமோ அதை செய்து தான் ஆக வேண்டும் என்று கூறி, போஸ்ட்மார்டம் செய்யத் தயாராகிறார் தன்யா.
சென்னை காசிமேடு பகுதியில் பெரும் டானாக இருப்பவர் டேனியல் பாலாஜி. அப்பகுதி மக்கள் இவரை காசிமேடு அர்னால்டு என்று அழைக்கின்றனர். தனக்கென ஒரு ரெளடி கும்பலை வைத்துக் கொண்டு பல கொலைகளை செய்து வருகிறார். இப்படி ரெளடியாக வலம் வந்தாலும், தனது குருநாதர் பாக்யராஜ் மீது அளவு கடந்த மரியாதை வைத்திருக்கிறார். இந்த போஸ்ட்மார்டம் செய்வதை தடுப்பதற்கு பாக்யராஜ், தாதா டேனியல் பாலாஜியின் உதவியை நாடுகிறார் .பிரபல ரவுடியான டேனியல் பாலாஜியும் தன்யாவிடம் பாக்யராஜ் மகள் உடலை உடல் கூறு செய்யாமல் கொடுக்கும்படி மிரட்டுகிறார். தனக்கு வரும் எதிர்ப்புகளை மீறி பாக்யராஜ் மகள் உடலை பிரேத பரிசோதனை செய்து உடலை தருகிறார் தன்யா. அதன்பிறகு டேனியல் பாலாஜி தன்யாவை கொலை செய்ய திட்டமிடுகிறார். இவரின் இந்த செயலுக்கு போலீஸ் எதிர்த்து நிற்க, இறுதியில் என்ன நடந்தது என்பதுதான் ‘ ”B P 180”.படத்தின் மீதிக் கதை.
கதையின் நாயகியாக மருத்துவர் தங்கம் என்ற கதாபாத்திரத்தில், தைரியமான பெண்ணாக நடித்திருக்கும் தன்யா, தனது அளவான நடிப்பு மூலம் அனைவரின் கவனத்தையும் ஈர்க்கிறார். நோயாளிகளிடம் பரிவு கொள்வதும் சிறுமை கண்டு பொங்குவதும் பாதகம் செய்பவரைக் கண்டால் பயம் கொள்ளாமல் எதிர்கொள்வதும் என அந்த கதாபாத்திரத்தில் அவர் மிடுக்காக வந்து மிளிர்கிறார்.
டேனியல் பாலாஜி, அர்னால்டு எனும் கொடூரமான கதாபாத்திரத்தை அசத்தலாக வெளிப்படுத்தி அந்த கதாபாத்திரத்தை வெறுக்கும்படி செய்கிறது. இப்படத்தின் ஒட்டுமொத்த கதையையும் தன் தோள் மீது சுமந்து சென்றிருக்கிறார் டேனியல் பாலாஜி. அப்படி ஒரு மிரட்டலான நடிப்பைக் கொடுத்து அசத்திருக்கிறார்.
இயக்குநர் கே.பாக்யராஜ் அழுத்தமான கதாபாத்திரத்தில் பெரும் எதிர்பார்ப்பை ஏற்படுத்தி, தன் இருப்பை அழுத்தமாகப் பதிவு செய்திருக்கிறார்.
முன்னாள் எம்.எல்.ஏ-வாக நடித்திருக்கும் அருள்தாஸ், காவல்துறை ஆணையராக நடித்திருக்கும் தமிழ், சமூக ஆர்வலராக நடித்திருக்கும் ஜாக் அருணாச்சலம், நாயகியின் தங்கையாக நடித்திருக்கும் ஸ்வேதா டோரத்தி, சகோதரராக நடித்திருக்கும் ரங்கா, தோழியாக நடித்திருக்கும் நயனா ஆகியோர் கொடுத்த வேலையைக் குறையின்றி செய்திருக்கிறார்கள்.
ஒளிப்பதிவாளர் இராமலிங்கம், வடசென்னைப் பகுதி, அங்கு வாழும் மக்கள் ஆகியோரின் உள்ளும் புறமும் மட்டுமின்றி ஒளி, இருள் இரண்டையும் ஒன்றிணைத்து அவரது ஒளிப்பதிவு கதாபாத்திரங்களின் தன்மையை அழுத்தமாகப் பதிவு செய்துள்ளது.
தனது பின்னணி இசையின் மூலம் படத்தின் வேகத்தை அதிகரித்துள்ளார் இசை அமைப்பாளர் ஜிப்ரான் .
ஒவ்வொரு காட்சிக்கு காட்சி அடுத்து என்ன நடக்கும் என்ற எதிர்பார்ப்பைக் கொடுத்துக் கொண்டே படம் முழுவதையும் நகர்த்தியிருந்தார் இயக்குனர் ஜெ.பி. குற்றம் செய்தவருக்கு தண்டனையை மட்டும் அல்லாது, திருந்த ஒரு வாய்ப்பும் வழங்கப்பட வேண்டும் என்ற கருத்தையும், மனிதாபிமானத்தின் பெருமையையும் மன்னிப்பின் மேன்மையையும் உயர்த்திப் பிடித்துள்ள இந்த படம் ரசிகர்களைக் கவரும் என்பதில் ஐயம் இல்லை.
மொத்தத்தில், ‘B P 180’ ஒரு வித்தியாசமான படம்.