’யூத்’ திரைப்பட விமர்சனம்!

சென்னை:

கென் கருணாஸ், அனிஷ்மா அனில்குமார், மீனாட்சி தினேஷ் ,பிரியதர்ஷினி யாதவ், தேவதர்ஷினி, நளினி,சுராஜ் வெஞ்சர மூடு மற்றும் பலர் நடித்துள்ள படம்தான் “யூத்”, இப்படத்தில் கதாநாயகனாக் நடித்த கென் கருணாஸ் இயக்கியும் உள்ளார். ஜி .வி. பிரகாஷ் இசையமைத்துள்ளார்.

பத்தாம் வகுப்பில் குறைந்த மதிப்பெண் எடுத்த காரணத்தால் பதினோராம் வகுப்பில் சேரமுடியாத சிக்கலில் இருக்கும் நாயகன் கென்கருணாசை தந்தை சுராஜ் வெஞ்சரமூடு மற்றும் அம்மா தேவதர்ஷினி ஆகியோர் பள்ளி முதல்வர் நளினியிடம் மிகவும் கெஞ்சி கூத்தாடி  11 ஆம் வகுப்பில் சேர்க்கிறார்கள். 10ம் வகுப்பில் மிக குறைந்த மதிப்பெண்கள் எடுத்து தேர்ச்சி பெறும் கென் கருணாஸ், 11ம் வகுப்பில் படிப்பின் மீது கவனம் செலுத்தாமல் காதல் மீது கவனம் செலுத்துகிறார். இந்த நேரத்தில் அதே பள்ளியில் படிக்கும் மீனாட்சி தினேஷும், கென் போலவே  படிப்பில் கடைசி இடத்தில் இருக்கிறார். இந்த மீனாட்சிக்கும், கென்னுக்கும் தண்டனைக்குள்ளாகி வகுப்பறைக்கு வெளியில் நிற்கும்போது இருவரும் தங்களது பார்வையால் பரிமாறிக் கொள்ளும்போது கென்னின் நண்பர்களால் தூண்டப்பட்டு அது காதலாக மாறுகிறது.

இந்த சூழலில் காதலி மீனாட்சி ஒரு திருமணத்திற்காக வெளியூர் செல்கிறார். இந்த நேரத்தில் அதே பள்ளியில் படிக்கும் இன்னொரு மாணவியான பிரியதர்ஷினி,  கென்னிடம் நெருக்கம் காட்டுகிறார். தந்தையின் அக்கறை, அம்மாவின் நம்பிக்கை இரண்டையும் நினைத்துப் பார்க்காமல் வயது கோளாறில் எந்த நேரமும் காதல் மயகத்திலேயே இருக்கும் கென், பன்னிரண்டாம் வகுப்பு முடிப்பதற்குள் இரண்டு காதல்களை கடக்கிறார். இரண்டு காதலும் பொய்த்துப் போகிறது.இரண்டும் கெட்டான் நிலையில் சிக்கித் தவிக்கும் கென் கருணாஸிடம், அவரது வகுப்பிலேயே படிக்கும் அனிஷ்மா என்ற மூன்றாவதாக ஒரு பெண் அறிமுகமாகிறார். கென்னிடம் நெருக்கமாகப் பழகி, அதிக உரிமையும் எடுத்துக் கொள்கிறார். அதனால் அவரைக் காதலிப்பதாகக் கென் கூறும் போது, நட்பாகத்தான் பழகினேன் அப்படி எல்லாம் ஒன்றும் நமக்குள் இல்லை என்கிறார் அனிஷ்மா. படிப்பா.. காதலா.. என்ற சூழலில் வேதனையுடன் கென் நிற்குப்போது பிளஸ் டூவில் தேர்ச்சி பெற்று விட்டால் உன்னை நான் காதலிக்கிறேன் என்று நிபந்தனை விதிக்கிறார் அனிஷ்மா.. இறுதியில் காதலில் வெற்றி பெற படிப்பில் தேர்ச்சி பெற்றாரா? இல்லையா? என்பதுதான் ‘யூத்’ படத்தின் மீதிக் கதை.

கென் கருணாஸ் இதில் பிரவீன் என்கிற பாத்திரத்தில் வருகிறார். பத்தாவது படிக்கும் மாணவனாக அறிமுகமாகி பிளஸ் டூ முடிக்கும் மாணவராக ஆகும் வரை கதை அருமையாக செல்கிறது. தனுஷ், சிம்பு ஆகியோரது சாயல் அவரது நடிப்பு மற்றும் உடல் மொழியில் தெரிந்தாலும், தனது துள்ளல் நடிப்பு மூலம் படம் முழுவதையும் தூக்கி சுமந்து இருக்கிறார். முதல் பாதியில் யாருக்கும் அடங்காத ஒரு மாணவனாகவும்… பள்ளிக்கு வருவதே காதல் செய்வதற்குதான் என்று கென் செய்யும் சேட்டைகள் இளவயதினரை ரசிக்க வைக்கிறார்.

அனிஷ்மா அனில்குமார், மீனாட்சி தினேஷ், பிரியான்ஷி யாதவ் என படத்தில் மூன்று நாயகிகள் இருக்கிறார்கள்.மூவரும் பள்ளி மாணவிகளாக பள்ளிப் பருவக் காதலை மிக அழகாக வெளிப்படுத்தி விறுவிறுப்பான இந்தக்கதைக்கு பலம் சேர்த்திருக்கிறார்கள்.

வாழ்க்கையில் தோல்வியை சந்தித்த ஒரு அப்பாவின் உள்ளார்ந்த பயத்தை சுராஜ் நுட்பமாக வெளிப்படுத்துகிறார். அதற்கு இணையாக, தேவதர்ஷினியின் பாசமிகு தாய் உருவம் கதைக்கு உணர்ச்சி மிகுந்த  பலத்தை சேர்த்திருக்கிறது.

நாயகனின் நண்பர்களாக நடித்திருக்கும் அனைத்து நடிகர்களும் எனர்ஜியோடு நடித்திருக்கிறார்கள். அந்த குண்டு பையனின் உடல் மொழி மற்றும் டைமிங் வசனங்கள் படத்தை கலகலப்பாக நகர்த்தி சென்று கைத்தட்டல் பெறுகின்றன.

ஒளிப்பதிவாளர் விக்கி, காட்சிகளை வண்ணமயமாக பதிவு செய்து, இளைய தலைமுறையின் மனநிலைக்கு ஏற்ற காட்சிகளை உருவாக்கி சிறந்த முறையில் பதிவு செய்துள்ளார்.

இசையமைப்பாளர் ஜி.வி. பிரகாஷ் குமார் இசை காதல் கொண்டாட்டத்துடன் படத்திற்குப்இசையமைப்பாளர் ஜி.வி. பிரகாஷ் குமார் இசை காதல் கொண்டாட்டத்துடன் படத்திற்குப் பெரிய பலம் சேர்த்திருக்கிறது.

கென் கருணாஸ் இயக்குனராகவும், நாயகனாகவும் இரட்டை பொறுப்பை ஏற்று,  இந்த காலகட்ட இளைஞர்களுக்கு ஏற்ற மாதிரி அதற்குள் ஒரு நல்ல கருத்தையும் சொல்லும்படியாகவும் சென்டிமென்ட் காட்சிகளை இணைத்தும் தன் வயதுக்கு மீறிய படமாக இயக்கி இருப்பதை பாராட்டாமல் இருக்க முடியாது.  எந்தவித தொய்வின்றி ஆரம்பம் முதல் முடிவு வரை, நகைச்சுவையோடும், ரசிக்கும்படியாகவும் படத்தை நகர்த்தி சென்றிருக்கும் கென் கருணாஸ், இனி தொடர்ந்து இது போன்ர சிறந்த கதைகளை தேர்வு செய்து இயக்கினால் கண்டிப்பாக வெற்றி இயக்குனர்  வரிசையில் வந்து விடுவார்.

மொத்தத்தில், ‘யூத்’  படத்தை குடும்பத்துடன் பார்க்கலாம்.

ரேட்டிங் 3.5/5.