‘பூக்கி’ – திரைப்பட விமர்சனம்!

சென்னை:

அஜய் திஷன், ஆர்.கே. தனுஷா முன்னணி கதாபாத்திரங்களில் நடிக்க,  இவர்களுடன் பாண்டியராஜன், சுனில், லட்சுமி மஞ்சு, இந்துமதி மணிகண்டன், ஆதித்யா கதிர், விவேக் பிரசன்னா, பிளாக் பாண்டி, பிக் பாஸ் சத்யா, எம்.ஜே. ஸ்ரீராம், ராதா, அஷ்வின் ராம், ஷியாரா ஷர்மி, பிரியங்கா உள்ளிட்டோர் முக்கிய வேடங்களில் நடித்துள்ள படம்தான் “பூக்கி”. இப்படத்தை கணேஷ் சந்திரா ஒளிப்பதிவு செய்து இயக்கி இருக்கிறார்.

சமூக ஊடகங்களின்  இன்றைய இளைஞர்களின் காதல் வெளிப்பாட்டில் பரவலாக பயன்படுத்தப்படும் சொல்தான் “பூக்கி”  இப்படத்தில் வரும் காதலர்கள் நாயகன் அஜய்யும், நாயகி தனுஷாவும் காரில் செல்லும்போது இருவருக்கும் வாக்குவாதம் ஏற்படுகிறது.  அப்போது சிக்னலில் வேறொரு கார் இவர்களது காரின் மீது இடித்துவிட்டு வேகமாக செல்ல, துரத்திச் சென்று அந்த காரை மடக்கி சண்டை போடுகிறார் அஜய். இருவரும் அடிதடியில் ஈடுபட தனுஷா அந்த சண்டையை தடுக்கிறார். அதனால் கோபமடைந்த அஜய், தனுஷாவின் கன்னத்தில் ஓங்கி அறைந்து விடுகிறார். தனுஷாவும் கோபத்தில் அஜய்யின் கன்னத்தில் அறைகிறார். இதனால் இவர்களது காதல் பிரேக் அப் ஆகிறது. இவர்கள் இருவரும் நடுரோட்டில் சண்டை போட்ட இந்த சம்பவத்தை அப்பகுதியினர் வீடியோ எடுத்து சமூக வலைத்தளத்தில் வெளியிடுகின்றனர். அது மக்கள் மத்தியில் பெரிய அளவில் பரபரப்பாகி இருவருமே வெளியில் தலைகாட்ட முடியாத அளவுக்கு அந்த வீடியோவை பலரும் கிண்டலடித்து ரசிக்கின்றனர்.

இந்த காதலர்கள் பிரிந்தாலும், அவர்களால் பிரிவை ஏற்றுக் கொள்ள முடியாமல் இருவரும் தவிக்கிறார்கள். பிரிந்த பின்னரும், ஒருவரை ஒருவர் மறக்க முடியாமல் தவிக்கும் அவர்கள், அந்த வேதனையிலிருந்து தப்பிக்க தனக்கு பிடித்தமானவர்களிடம் உறவு வைத்துக் கொள்ள முயல்கிறார்கள். இறுதியில் இவர்களது காதல் என்னானது ?  இருவரும் ஒன்றிணைந்தார்களா? என்பதுதான் “பூக்கி” படத்தின் மீதிக் கதை.

கதாநாயகனாக நடித்திருக்கும் அஜய் திஷன், தனது துடிப்பு மிக்க நடிப்பாலும், காதல் உணர்வுகள், காதலியை பிரிந்த சோகம்,  தந்தை மீது  பாசம் உட்பட பல்வேறு அழுத்தமான உணர்வுகளை சிறப்பாக வெளிப்படுத்தி வரவேற்பு பெறுகிறார். இந்த படம் முழுவதும் பல உணர்வுகளை மிக நேர்த்தியாக வெளிப்படுத்தி தனது கதாபாத்திரத்திற்கு நியாயம் சேர்த்திருக்கிறார்அஜய்.

கதாநாயகி தனுஷாவுக்கு கதையில் முக்கியத்துவம் கொடுத்து ஒரு உன்னதமான கதாபாத்திரத்தில் நடிக்க வைத்து இருக்கிறார்கள். அதன் தன்மையை உணர்ந்து உண்மையான காதலியாக வாழ்ந்து இருக்கிறார். இப்படத்திற்கு பிறகு இவரைத் தேடி பல படங்கள் வரும் என்பதில் சிறிதும்  ஐயமில்லை.

லக்‌ஷ்மி மஞ்சு, பாண்டியராஜன்,சுனில், இந்துமதி மணிகண்டன், விவேக் பிரசன்னா, பிளாக் பாண்டி, ஆதித்யா கதிர், பிக்பாஸ் சத்யா, எம்.ஜே.ஶ்ரீராம்,அஸ்வின் ராம், ஷியாரா ஷார்மி, பிரியங்கா ஆகியோர் ஏற்றுக் கொண்ட வேடங்களுக்கு பொருத்தமாக நடித்திருக்கிறார்கள்.

இப்படத்திற்க்கு இசை மற்றும் படத்தொகுப்பு ஆகியனவற்றை விஜய் ஆண்டனி மேற்கொண்டிருக்கிறார். இப்படத்தின் முக்கிய பலமாக பாடல்களும், பின்னணி இசையும் மிக சிறப்பாக அமைந்துள்ளது.

கதை,திரைக்கதை,வசனம் எழுதியிருக்கும் புதியபரிதி, இக்கால இளையதலைமுறையின் எண்ணவோட்டங்களைக் கூர்ந்து கவனித்து யதார்த்தமாக பதிவு செய்து இருக்கிறார்.

இப்படத்திற்கு ஒளிப்பதிவு செய்து இயக்கியிருக்கிறார் கணேஷ் சந்திரா.  காதல் வலியின் ஆழத்தை இளம் தலைமுறையினர் உணரக்கூடிய விதத்தில்  பார்ப்போர் மனதை உருக வைத்து காட்சிபடுத்தியிருப்பதை அவருடைய பலம் என்றுதான் சொல்ல வேண்டும்.

மொத்தத்தில், ‘பூக்கி’  படம் காதலர்களுக்கு ஒரு பாடம்.

ரேட்டிங் 3/5.