தி பெட்’ (The Bed) திரைப்பட விமர்சனம்!

சென்னை:

“தி பெட்” என்ற இப்படத்தில் ஸ்ரீகாந்த், சிருஷ்டி டாங்கே, பிளாக் பாண்டி , விஜே பப்பு, விக்ரம், திவ்யா, ஜான் விஜய், தேவி பிரியா மற்றும் பலர் நடித்துள்ளனர். எஸ். மணி பாரதி எழுதி இயக்கியுள்ளார். ஒளிப்பதிவு கோகுல்,இசை தாஜ் நூர்.

ஸ்ரீகாந்த் அவரது நண்பர்கள் பிளாக் பாண்டி, விஜே பப்பு, விக்ரம் ஆகியோர் ஐடி துறையில் வேலை பார்க்கிறார்கள். எப்பொழுதும் வார விடுமுறையை நான்கு பேரும் சேர்ந்து மது மயக்கத்தில் திளைப்பார்கள். இந்த சூழலில் வித்தியாசமாக ஊட்டிக்கு செல்லலாம் என்று முடிவெடுக்கும் நண்பர்கள் மதுவுடன் மாதுவையும் அனுபவிக்க முடிவு செய்கின்றனர். இந்நிலையில் வலைதள தேடலில் ஒரு புரோக்கர் மூலம் விலைமாதுவான சிருஷ்டி டாங்கே கிடைக்க,அவரை  சந்தித்து பணத்தை கொடுத்து ஊட்டிக்கு அழைத்துச் செல்கின்றனர். இப்படி உடன் வரும் சிருஷ்டி டாங்கே மீது நண்பர்கள் காமப் பார்வை வீச நாயகன் ஸ்ரீகாந்த் மட்டும் காதல் பார்வை வீசுகிறார்.அவரை அடைய நண்பர்கள் தவிக்க, ஸ்ரீகாந்த் யாரும் தொட முடியாதபடி தவிர்க்க இந்தப் போராட்டத்தில் திடீரென்று சிருஷ்டி காணாமல் போய்விடுகிறார். உடன் வந்த நான்கு நண்பர்களில் ஒருவரும் காணாமல் போய்விடுகிறார்.இப்படி யார் கண்ணிலும் படாமல் மறைந்து விட்ட அவர்களை அனைவரும் ஊட்டி முழுக்கத் தேடுகிறார்கள். ஆனால் அவர்கள் என்ன ஆனார்கள்? அவர்கள் மாயமானதன் பின்னணியில் இருக்கும் மர்மம் என்ன ? என்பதுதான் “தி பெட்” படத்தின் மீதிக் கதை.

ஸ்ரீகாந்த் ஹீரோவாக நடித்திருந்தாலும், மென்பொருள்துறை பணியாளர் வேடத்துக்குக் கச்சிதமாகப் பொருந்தியிருக்கிறார்.விலைமகள் எனினும் அவர் மீது காதல் கொண்டு அவரைப் பாதுகாக்கத் துடிக்கும் காட்சிகளில் பாராட்டுப் பெறுகிறார். அவர் தான் ஏற்று நடித்த கதாபாத்திரத்திற்கு நியாயம் சேர்க்கும் வகையில் நடித்திருக்கிறார்.

கதாநாயகியாக நடித்திருக்கும் சிருஷ்டி டாங்கே, அழகோடு கொஞ்சம் கவர்ச்சியாகவும் வலம் வந்து பார்வையாளர்களை கவர்கிறார். அளவான நடிப்பு மற்றும் கவர்ச்சியில் படம் முழுவதும் ரசிக்க வைத்திருக்கிறார்.

ஸ்ரீகாந்தின் நண்பர்களாக நடித்திருக்கும் பிளாக் பாண்டி, விஜே பப்பு, விக்ரம், போலீஸ் இன்ஸ்பெக்டராக நடித்திருக்கும் ஜான் விஜய், நாயகியின் அம்மாவாக நடித்திருக்கும் திவ்யா, போலீஸ் சப் இன்ஸ்பெக்டராக நடித்திருக்கும் தேவி பிரியா ஆகியோர் அளவாக நடித்து கதாபாத்திரங்களுக்கு பலம் சேர்த்திருக்கிறார்கள்.

மலைபிரதேசத்தில் அமைந்துள்ள வீடுகள், போலீஸ் நிலையம் என்று கொடுக்கப்பட்ட இடங்களில் காட்சிக் கோணங்களில் திறமையுடன் செயல்பட்டிருக்கிறார் ஒளிப்பதிவாளர் கோகுல்.

தாஜ்நூர் இசையில் ஒரு பாடல் என்றாலும், ரசிக்க வைக்கும் ரகமாக இருக்கிறது. பின்னணி இசை கதைக்களத்திற்கு ஏற்ப பயணித்திருக்கிறது.

விலை மாதுவான நாயகியை மையப்படுத்திய கதைக்கரு என்றாலும், எந்தவித ஆபாசமும் இன்றி காட்சிகளை அழகியலோடு அனைவரும் ரசிக்கும் விதத்தில் இயக்கி இருக்கிறார் எஸ்.மணிபாரதி. எந்தக் கதையாக இருந்தாலும்,போரடிக்காமல் கொண்டு சென்று ரசிகர்களை இருக்கையில் கட்டிப்போட வேண்டும் என்ற நோக்கத்தில் அதை முறையாகக் கடைபிடித்திருப்பது இயக்குநரின் பலம் என்றுதான் சொல்ல வேண்டும். அப்படி இந்தப் படத்தில் அவர் சொல்ல வந்த கதையை மிக நாகரீகமாகவும், எளிமையாகவும் திரைக்கதையாக்கி இயக்கியிருக்கிறார்.

மொத்தத்தில், ‘தி பெட்’  படம் இளம் வாலிபர்களை ரசிக்க வைக்கும்.

ரேட்டிங் 3/5.