‘பிரேக்ஃபாஸ்ட்’ (BreakFast) திரைப்பட விமர்சனம்!

CHENNAI:

கிரிஜா வரதராஜ் தயாரித்திருக்கும் ‘பிரேக் ஃபாஸ்ட்’ படத்தை திரைக்கதை, வசனம் எழுதி இயக்கியிருக்கிறார் ஏ.ஆர். காந்தி கிருஷ்ணா.  இப்படத்தில் ராணவ், ரோஸ்மின், சம்பத் குமார், கஸ்தூரி, அர்ச்சனா, கிருத்திக் மோகன், அமிதா ரங்கந்த், ரவி மரியா மற்றும் பலர் நடித்துள்ளனர்.

இன்றைய காலம் என்று காலம் தோறும் காதல் எப்படிப் பார்க்கப்பட்டது என்கிற முன்னுரையோடு படம் தொடங்குகிறது . இன்றைய காலக்கட்டத்தில் இளைஞர்கள் மனதில் அவசர அவசரமாக தோன்றும் காதல், அவர்கள் தம்பதிகளான உடன் அதை விட வேகத்தில் எப்படி பிரிவை நோக்கி செல்கிறார்கள் என்பதை உணர்வுபூர்வமாக பேசும் படம் தான் ‘பிரேக்ஃபாஸ்ட்’..

பெரும் கோடீஸ்வர தொழிலதிபரான சம்பத் ராஜின் மகளான நாயகி ரோஸ்மின், நன்கு படித்த, நேர்மையான கிராமத்து இளைஞனான ராணவுக்கு சரியான வேலை கிடைக்காமல் சாலை சுத்தம் செய்யும் பணியை செய்துக் கொண்டிருக்கும் சூழலில் ஏழ்மை குடும்பத்தில் பிறந்து வளர்ந்தாலும் திறமைசாலியான  அவருக்கு தனது நிறுவனத்தில் வேலை போட்டுக் கொடுக்கிறார். இருவேறு பின்னணியில் இருந்து வந்த இவர்கள் இருவரும் நட்புடன் பழகினாலும் அந்த நட்பு பின்பு காதலாக மாறுகின்றது. இவர்களது காதலை ஏற்க மறுத்த தந்தை சம்பத் ராஜின் கடும் எதிர்ப்பையும் மீறி, ரோஸ்மின் ராணவ்வை திருமணம் செய்துக் கொண்டு அவரைத் தனது நிறுவனத்தின் நிர்வாக இயக்குநர் பதவியை உருவாக்கி கொடுக்கிறார்.

அதன் பிறகு ராணவுக்கு பணக்கார வசதியான வாழ்க்கையை அமைத்து கொடுத்தாலும், பிறகு தந்தையின் அவமான பேச்சுக்களை சகிக்க முடியாமல் வீட்டை விட்டு வெளியேறி தனியாக சென்று வாழ்கின்றனர். ஆரம்பத்தில் இருவரும் மகிழ்ச்சியாக இல்லற வாழ்க்கையை நடத்தினாலும் அடிக்கடி இருவருக்குள் பிரச்சனைகளும். மோதல்களும் ஏற்படுகின்றன.  எல்லாவற்றையும் சகித்துக் கொண்ட ராணவ் தன் காதல் மனைவி ரோஸ்மின்னின் ஆணவம் நிறைந்த அகங்கார பேச்சுக்கள் பிடிக்காததால் மனதில் நிம்மதி இல்லாமல் தவறான புரிதல்கள் காரணமாக அவரை விட்டு பிரிகிறார். இறுதியில் பிரிந்தவர்கள் மன மாறுதல் ஏற்பட்டு ஒன்று சேர்ந்தார்களா? இல்லையா?  என்பது தான் ‘பிரேக் ஃபாஸ்ட்’  படத்தின் மீதிக் கதை.

இப்படத்தில் கதாநாயகனாக நடித்திருக்கும் பிக் பாஸ் புகழ் ராணவ், அறிமுகப்படம் போல் தெரியாமல் மிகுந்த அனுபவசாலி போல் கதாபாத்திரத்தின் தன்மையை உணர்ந்து நடித்துள்ளார். காதல் காட்சிகளில் உற்சாகம் மிக்கதாகவும், திருமணத்துக்கு முன் பெற்றோர் பற்றிய சிந்தனையுடனும் ஆழமான உணர்வுகளையும் அழுத்தமாக வெளிப்படுத்தி அசத்தி இருக்கிறார்.

கதாநாயகியாக நடித்திருக்கும் அறிமுக நடிகை ரோஸ்மின், தனது முதல் படத்திலேயே பணக்கார பெண் எப்படி தன் ஆணவ குணத்தை வெளிப்படுத்துவாளோ அதை யதார்த்தமாக வெளிப்படுத்தி  தனது கதாபாத்திரத்தை நிறைவாக செய்துள்ளார்.

மற்றொரு நாயகன், நாயகியாக நடித்திருக்கும் கிரித்திக் மோகன் – அமிதா ரங்கநாத் ஜோடி, வயதுக்கு ஏற்ப இளமை துள்ளல் மற்றும் மோதல் நடிப்பை வெளிப்படுத்திப் படத்தின் கதைக்கு பலம் சேர்த்துள்ளனர்.

படத்தின் மிக முக்கியமாக கதாநாயகியின் தந்தை வேடத்தில் நடித்திருக்கிறார் சம்பத் ராஜ், .நாயகனின் அம்மாவாக அர்ச்சனா நடித்திருக்கிறார்.ஒவ்வொருவரும் தங்களுக்கு கொடுத்த கதாபாத்திரத்தை உணர்ந்து நடித்து இருக்கிறார்கள். மருத்துவ ஆலோசகராக நடித்திருக்கும் கஸ்தூரியும் நடிப்பில் குறை சொல்ல முடியாது.

எம்.வி.பன்னீர் செல்வம் தனது ஒளிப்பதிவில் முதிர்ச்சியான கோணங்களில் காட்சிகளை அழகாகக் காட்டி ரசிக்க வைத்து இருக்கிறார்.

ஜி.வி.பிரகாஷ் குமாரின் இசையில் பாடல்களில் அவர் ஆர்வம்  காட்டவில்லை என்றாலும் இதமாக ஒலிக்கிறது.  பின்னணி இசை ஓகே.

இப்போதுள்ள காதலர்களைப் பற்றி அதிகம் பேசாமல், குடும்ப பிரச்சனை அதன் மூலம் ஏற்படும் பிரிவு ஆகியவற்றை அதிகமாக பேசியிருக்கும் இயக்குநர் ஏ.ஆர்.காந்தி கிருஷ்ணா, இளைஞர்கள் புரிந்து கொள்ளும் வகையில் சில காட்சிகளை வைத்து பெற்றோரையும் யோசிக்க வைத்திருக்கிறார். காதல் என்றால் இரண்டுபேர் மட்டும் சம்பந்தப்பட்ட விஷயம் இல்லை.அது இரண்டு குடும்பங்கள் இணைந்து வாழ்வியலை நடத்தும் வாழ்க்கை என்பதை மிக தெளிவாக காட்டி பார்வையாளர்களை எளிதில் படத்துடன் ஒன்றிவிட வைத்து விடுகிறார் இயக்குனர்.

மொத்தத்தில், ‘பிரேக்ஃபாஸ்ட்’  இளம் தலைமுறை தம்பதிகளின் வாழ்க்கையை புரிய வைக்கும் படம்.

ரேட்டிங் 3/5.