‘Lik’ (லவ் இன்சூரன்ஸ் கம்பெனி) திரைப்பட விமர்சனம்!

CHENNAI:

நடிகர்கள்: பிரதீப் ரங்கநாதன், கிரித்தி ஷெட்டி, சீமான் , எஸ் ஜே சூர்யா, யோகி பாபு , கௌரி ஜி கிஷன் , ஷாரா  , ஆனந்தராஜ் , மாளவிகா மற்றும் பலர் நடித்திருக்கும் படம்தான் “‘Lik’ (லவ் இன்சூரன்ஸ் கம்பெனி)

தொழில்நுட்ப குழு

எழுத்து & இயக்கம் : விக்னேஷ் சிவன்.
தயாரிப்பாளர்: நயன்தாரா
தயாரித்து வழங்குபவர் : எஸ்.எஸ்.லலித் குமார்
ஒளிப்பதிவு  : ரவி வர்மன் ASC ISC
தயாரிப்பு வடிவமைப்பு: முத்துராஜ்தங்கவேல்
ஸ்டண்ட்: பீட்டர் ஹெய்ன்
எடிட்டர்: பிரதீப் இ ராகவ்.

காதல் என்பது இரண்டு மனங்களின் உணர்வு அதை எந்தச் செயலியோ, எந்த இயந்திரமோ தீர்மானிக்க முடியாது என்பதைக் கச்சிதமாக பதிவு செய்திருக்கும் படம் தான் இந்த “LIK”. இந்தப் படத்தின் கதை 2040-ஆம் ஆண்டில் நடப்பதாக திரைக்கதை அமைத்து இயக்கி இருக்கிறார் விக்னேஷ் சிவன். 

தன்னுடைய மனைவியுடன் ஏற்பட்ட திருமணம் முறிவினால் கடும் மனக் கசப்பு ஏற்பட்டு எஸ்.ஜே.சூர்யா  தன் மனைவியை விட்டு பிரிகிறார். இதனால் திருமணத்திற்கு முன்பே காதலிக்கும்போது காதலர்கள் ஒருவரையொருவர் தெளிவாக புரிந்து கொள்ள வேண்டும் என்கிற எண்ணத்தில் ஒரு செயலியை உருவாக்க முயற்சி செய்து  ‘லவ் இன்சூரன்ஸ் கம்பெனி’ (Love Insurance Kompany – LIK) அதாவது ’லைக் ’(LIK)  என்கிற ஒரு செயலியை கண்டுபிடிக்கிறார். அந்த செயலியில் காதல் ஜோடிகள் கை கொடுத்தால் இருவருக்கும் காதல் பொருத்தம் இருக்கிறதா இல்லையா என்பதை நொடிப்பொழுதில் காட்டிவிடுகிறது. அது மட்டுமல்ல கணவன் மனைவி இருவர் இடையே உள்ள பாசத்தையும் ஒருவருக்கொருவர் வெளிப்படையாகச் சொல்லிவிடும் தன்மை கொண்டதாகவும் அந்த செயலி இருக்கிறது. இந்த லைக் (LIK) செயலி நாடெங்கும் வரவேற்பு பெற்றுப் பெரும் பரபரப்பாகி, இளைஞர்கள் மத்தியில் பேசும் பொருளாக மாறுகிறது.

காதலர்களிடம் மட்டும் இன்றி, திருமணமானவ்ர்களிடமும் பெரும் வரவேற்பு பெற்று வரும் லைக் (LIK) செயலியின் பயன்பாடு நாளுக்கு நாள் அதிகரித்து வருகிறது. இந்த சூழ்நிலையில், அதன் ஒரு வாடிக்கையாளரான நாயகி கிரித்தி ஷெட்டி, ஸ்மார்ட்போனின் வழிகாட்டுதலின் மூலம் வளர்வதால், சமூக ஊடகங்களில் அதிக பின்தொடர்பவர்களை பெறுவதற்கான முயற்சியில் ஈடுபட்டு வருகிறார். இப்படிப்பட்ட சூழலில் பிரதீப் ரங்கநாதன் சீமானின் மகனாக தொழில்நுட்ப வசதிகள் இல்லாத ஒரு இடத்தில் பசுமை மண்டலம் பகுதியில் வசிக்கிறார். அங்கே செல்போன் தொல்லைகள்  இல்லாத  சமூக ஊடகங்களின் தாக்கங்கள் எதுவும் இல்லாத ஆரோக்கியமான பகுதியில் இருக்கிறார். இந்த சமயத்தில் பிரதீப் ரங்கநாதன், அழகு தேவதையான இளம் பெண் கிரித்தி ஷெட்டியை சந்திக்கிறார். தன்னையும் அறியாமல் அவர் மீது காதலில் விழுந்து,  அவரிடம் நட்பாக பழகுகிறார்.  அந்த இருவரது நட்பும் காதலாக மாறுகிறது.

அவர் தன் தந்தைக்கு தெரியாமல் கைபேசி வாங்குவதோடு, அதன் மூலம் (LIK) செயலியில் தன்னை இணைத்துக் கொண்டு கிரித்தி ஷெட்டியுடன் தொடர்பையும் ஏற்படுத்தி கொண்டு காதலில் ஈடுபட்டு எஸ்.ஜே.சூர்யாவிடம் சென்று அவர்களது ஜோடிப் பொருத்தத்தைப் பார்த்தபோது லைக் (LIK) செயலி 3 சதவீதம் தான் அவர்களுக்குள் பொருத்தம் உள்ளதாகக் கூறுகிறது. இதனால் பயந்து வேதனையடைந்த கிருத்தி, நமக்குள் காதல்  சரிப்பட்டு வராது என்று பிரதீப் ரங்கநாதனை விட்டு பிரிந்து சென்று விடுகிறார் . அதேவேளை லைக் (LIK) செயலி,பிரதீப்புடன் ஒரு நண்பரைப் போல் பழகும் கெளரி கிஷனுடன் ஜோடிப் பொருத்தம் 93 சதவீதம் இருப்பதாகக் கூறுகிறது. ஒரு மனித மன உணர்வுகளையும், காதலில் ஈடுபடுகிறவர்களையும் எப்படி ஓர் எந்திரம் கண்டுபிடிக்கும் என்ற வேதனையில் எஸ்.ஜே.சூர்யாவிடம் சென்று மனித உணர்வுகளைக் கணிக்கக் கூடிய எந்த ஒரு எந்திரமும் இதுவரையில் கண்டுபிடிக்கப்படவில்லை. என் காதலியை மீண்டும் காதலித்து  லைக் (LIK) செயலி செய்தது தவறு என்பதை நான் நிரூபித்துக் காட்டுகிறேன் என எஸ்.ஜே.சூர்யாவிடம் சவால் விடுகிறார் பிரதீப் ரங்கநாதன். அவர் போட்ட சவாலில் தனது காதலி கிருத்தியை காதலித்து வெற்றி பெற்றாரா? இல்லையா? என்பதுதான் ’லைக் (LIK)’படத்தின் மீதிக் கதை. 

வைப் வஸ்ஸி என்ற கதாபாத்திரத்தில் பிரதீப் ரங்கநாதன் தனது இயல்பான, எளிமையான நடிப்பை வெளிப்படுத்தி இருக்கிறார். சில காட்சிகளில் அவரது நடிப்பு கவர்ந்தாலும், பல இடங்களில் ஒரே மாதிரியான வெளிப்பாடு தெரிகிறது.தன் காதலி மீது தான் வைத்திருக்கும் அன்பை வெளிப்படுத்தும் காட்சிகளில் நகைச்சுவையைக் கடந்து ரசிக்கும் வகையில் தன் இருப்பை மிகுந்த வலியுடன் உணர்த்துகிறார்.

இதில் கதாநாயகியாக கிரித்தி ஷெட்டி தனது கதாபாத்திரத்தின் தன்மையை உணர்ந்து மிக அருமையாக தன் வசீகர முகத்தைக் காட்டி ரசிகர்களை கவர்கிறார். அவர் தனது தோற்றத்திலும், உடல் மொழியில், விழி மொழியில், முகபாவனையில் நடிப்பில் மிரட்டி இருக்கிறார்.

பிரதீப்பின் பாசமான தந்தையாக சீமான். தன்னுடைய மகன் தனக்கு திரும்ப கிடைக்க வேண்டும். அவன் பாசத்தை என் மீது கொட்ட வேண்டும் என்று பிரதீப்பின் நண்பன் சாராவிடம் பேசுகின்ற அந்த ஒரு காட்சி நம் மனதை கலங்க வைக்கிறது. 

காதலுக்கும், உணர்வுகளுக்கும் வில்லனாக நடித்திருக்கும் எஸ்.ஜே..சூர்யா, தனது வழக்கமான பாணியை அளவாக கையாண்டு கதாபாத்திரத்திற்கு தேவையான நடிப்பை மட்டுமே கொடுத்து படத்திற்கு பலம் சேர்த்திருக்கிறார்.

தனது தோற்றத்தில் வித்தியாசத்தை காட்டியிருக்கும் யோகி பாபுவின் நகைச்சுவையில் நம்மால் சிரிக்க முடியவில்லை என்றாலும் அவரது நடிப்பு எடுபடவில்லை.

கவர்ச்சியான ஆடைகளோடு வலம் வரும் கெளரி கிஷன் ரசிகர்களிடம் தாக்கம் ஏற்படுத்தாத கதாபாத்திரத்தில்  வலம் வருகிறார். பிரதீப் ரங்கநாதனின் நண்பராக நடித்திருக்கும் ஷாரா தனக்கு கொடுத்த வேலையை குறையின்றி செய்திருக்கிறார். நாயகியின் அம்மாவாக நடித்திருக்கும் மாளவிகா, ஆனந்தராஜ், சுனில் ரெட்டி ஆகியோர் திரையில் முகம் காட்டியிருக்கிறார்கள்.

ரவி வர்மனின் ஒளிப்பதிவு தரம். 2040-ல் சென்னை எப்படி இருக்கும் என்பதை  பிரம்மாண்டமாக காட்டுவதற்காக நிறைய சிஜி காட்சிகளும், விஎஃப்எக்ஸ் காட்சிகளும் படத்தில் வ்ண்ணமயமாக இடம் பெற்று அனைவரையும் கவர்கின்றன.

அனிருத்தின் இசையில் பாடல்கள் நமக்கு கேட்ட உணர்வைத் தருகின்றன.ஆனால் பின்னணி இசை பிரமாண்டத்தை உயர்த்தி அதிர வைக்கிறது.

ஒரு உண்மையான காதலை லைக் (LIK) செயலி மூலம் தடுக்க முடியாது என்பதை 2040 ஆண்டில் எப்படியிருக்கும்? என்பதை பலவித கற்பனையோடு எந்தக்காலத்திலும் காதலின் வலிமையை அழிக்க முடியாது.. என்பதைச் சொல்ல முயற்சி செய்து, இவ்வளவு பெரிய பட்ஜெட்டில் இந்தப் படத்தை எடுத்து இயக்கி இருக்கிறார் விக்னேஷ் சிவன். ‘தொழில்நுட்பம் என்பது நமது வாழ்க்கையை எளிதாக்கி விடலாம், ஆனால் ஒருபோதும் உண்மையான உணர்வுள்ள காதலுக்கு எதையும் வைத்து தீர்மானிக்க முடியாது” என்ற கருத்தை நகைச்சுவை கலந்து  அழுத்தமாக பதிவு செய்துள்ளார் இயக்குனர் விக்னேஷ் சிவன்.

மொத்தத்தில் ஒரு வித்தியாசமான சிந்தனையுடன் எடுத்த படம் ‘Lik’ (லவ் இன்சூரன்ஸ் கம்பெனி)

ரேட்டிங் 3/5.