’மை லார்ட்’ திரைப்பட விமர்சனம்!

சென்னை:

நடிகர் சசிகுமார், சைத்ரா ஜே.ஆச்சார், ஆஷா சரத் ,குரு சோமசுந்தரம், ஜெயபிரகாஷ், கோபி நயினார்,அருள் எழிலன், வசு மித்ரா நடித்துள்ளனர்.

இப்படத்தை ராஜுமுருகன் எழுதி இயக்கியுள்ளார்.நீரவ்ஷா ஒளிப்பதிவு செய்துள்ளார். ஷான் ரோல்டன் இசையமைத்துள்ளார்.சத்யராஜ்  நடராஜன் படத்தொகுப்பு செய்துள்ளார்.
2டி என்டர்டைன்மென்ட் வழங்க ஒலிம்பியா மூவிஸ் சார்பில் ஜெயந்தி அம்பேத்குமார் தயாரித்துள்ளார்.

இறக்க போகும் மனிதனின் கிட்னி, இதயம், ஈரல் போன்ற அனைத்தையும் தானமாகத்தான் கொடுக்க வேண்டும். பணத்திற்காக விற்கக் கூடாது என்பது மருத்துவத் துறையின் சட்டம் என்பது அனைவரும்மும் தெரிந்த விஷயம் என்றாலும், ஏழை, எளிய மக்களின் பொருளாதார சிக்கலை, அவர்களின் வறுமையை பயன்படுத்தி பல ஊர்களில், பல மருத்துவமனைகளில் பணத்திற்காக கிட்னியை விற்பது தொடர்ந்து நடந்து கொண்டுதான் இருக்கிறது. அப்படி ஒரு பிரச்சனையை மையமாக  வைத்துதான் “மை லார்ட்” என்ற இந்தப் படம் உருவாக்கப்பட்டுள்ளது.

கோவில்பட்டியில் தனது மனைவி சைத்ராவுடன் இணைந்து வாழ்ந்து கொண்டிருக்கும் சசிகுமார்,மனைவியின் மருத்துவ சிகிச்சைக்காக கந்து வட்டிகாரனிடம் கடன் வாங்குகிறார். பல பெரிய மருத்துவமனைகளில் தன் மனைவியின் உடல் நிலை குறித்து விசாரிக்கும்போது வயிற்றில் உள்ள கட்டியை அறுவை செய்து அகற்ற வேண்டும் என்று சொல்கிறார்கள். இதனால்  பல லட்சம்  ரூபாய் கடனாளியாகி வட்டிக்கு மேல் வட்டி கொடுக்க வேண்டிய சூழ்நிலை  ஏற்படுகிறது. ஒரு கட்டத்தில், அரசு ஆவணங்களில் சசிகுமாரும் அவரது மனைவியும் ‘இறந்துவிட்டதாக’ தவறாகப் பதிவு செய்யப்படுகின்றனர். உயிரோடு இருக்கும்போதே தங்களின் அடையாளத்தை இழந்து தவிக்கும் இவர்கள், அந்த அடையாளத்தை மீட்டெடுக்கப் போராடும்போதுதான் அதன் பின்னணியில் இருக்கும் அதிர்ச்சி அளிக்கும் வகையில் சட்டவிரோத கிட்னியை விற்கும் விஷயம் தெரிய வருகிறது. பணத்தை திருப்பி கொடுக்க சிலர் அவரது வறுமையைப் போக்க கிட்னியை விற்கலாம் என்று யோசனை கூறுகிறார்கள்.

இந்த சூழலில்  மத்திய அமைச்சரான ஆஷா சரத்துக்கு இரண்டு கிட்னிகளும் பழுதாகி உயிருக்கு போராடும் நிலை ஏற்படுகிறது. அதே சமயம், அவரது இரத்தப் பிரிவு மிகவும் அரிதானது என்பதால், அவருக்கான மாற்று கிட்னி கிடைப்பதில் தடுமாற்றம் ஏற்படுகிறது. ஆனால் கோவில்பட்டியில் இருக்கும் சசிகுமாரின் கிட்னி மட்டும் மத்திய அமைச்சருக்கு ஒத்து போவதால், அவரைத் தேடி மத்திய அமைச்சரின் ஆட்கள் ரகசியமாக சென்னைக்கு அழைத்து வர முயற்சி செய்கிறார்கள். சசிகுமாரையும், அவரது மனைவியையும் சென்னைக்கு அழைத்து அவர்களுக்கு வேண்டிய உதவிகளை செய்கிறோம் என்று சொல்லி இருவரது மனதையும் மாற்றி  மருத்துவ சிகிச்சை நடக்கும் மருத்துவமனைக்குக் கொண்டு செல்கிறார்கள்.அங்கே போனால் சசிக்குமாரின் மனைவி சைத்ராவின் கிட்னி  திருடப்பட்டுள்ள விஷயம் தெரிகிறது. இறுதியில் சசிகுமார் ஆஷா சரத்துக்கு சிறுநீரகம் கொடுத்தாரா? இல்லயா? என்பதுதான் ‘மை லார்ட்” படத்தின் மீதிக் கதை.

சசிகுமார் இப்படத்தில் முத்து சிற்பி என்ற கதாபாத்திரத்தில் வெகு பொருத்தமாக, அலட்டிக் கொள்ளாத தனது நடிப்பின் மூலம் அந்தப் பாத்திரமாகவே மாறிவிடுகிறார் அவரது அப்பாவியான முகம், சோகம் நிறைந்த வாழ்க்கை, வெள்ளந்தி சிரிப்பு என்று சசிகுமார் அந்த  கதாபாத்திரத்தின் தன்மையை உணர்ந்து வாழ்ந்து இருக்கிறார்.

தமிழ் திரையுலகிற்கு அறிமுகமாகியுள்ள சைத்ரா ஆச்சார், சுசீலா கதாபாத்திரத்தில் சிறப்பான நடிப்பைக் கொடுத்துள்ளார். குறிப்பாகக் கோயில் திருவிழாக் காட்சியில் அவர் சாமியாடும் காட்சி படத்தின் மிக முக்கியமான மற்றும் மிரட்டலான காட்சி என்றே சொல்லலாம்.

மத்திய அமைச்சர் கதாபாத்திரத்தில் நடித்திருக்கும் ஆஷா சரத், ஆணவம் அதிகாரம் மிகுந்த  திமிரையும் முகத்தில் காட்டி அழகாக நடித்துள்ளார்.நோயாளிப் படுக்கையில் இருந்தாலும் அவரது கதாபாத்திரத்தை அழகாக வெளிப்படுத்தியுள்ளார்.

மக்கள் குத்து எனும் பத்திரிகையாசிரியராக நடித்திருக்கும் குரு சோமசுந்தரம் தனது அனுபவமிக்க நடிப்பை வெளிப்படுத்தி அவரது உடல் மொழியில்… முத்துச்சிற்பியின் கதையை கொஞ்சம், கொஞ்சமாக அவர் சொல்லும்பொழுது மிக அழகாக நடித்திருக்கிறார்.

படத்தில் நீதிபதியாக வரும் ஜெயப்பிரகாஷ்,அருளாக வரும் பத்திரிகையாளர் அருள் எழிலன், வழக்கறிஞராக வரும் இயக்குநர் கோபி நயினார், வட்டித் தொழில் செய்யும் வசுமித்ரா என அனைவரும் தங்களுக்கு கொடுத்த கதாபாத்திரத்தை உணர்ந்து நடித்திருக்கிறார்கள்.

ஒளிப்பதிவாளர் நீரவ் ஷா, எளிய மனிதர்களின் வாழ்வியலை எதார்த்தமாக காட்சிப்படுத்தியிருப்பது பாராட்டத்தக்கது.

ஷான் ரோல்டனின் இசையில் பாடல்கள் அனைத்தும் ரசிக்கும் வகையில் அமைந்துள்ளது. பின்னணி இசையும் படத்தில் இடம்பெறும் கதாபாத்திரங்களில் ஒன்றாக பயணித்து இருப்பதை பாராட்டாமல் இருக்க முடியாது.

மனித உயிர்களை காப்பாற்ற வேண்டிய மருத்துவர்கள் தாங்கள் பணம் சம்பாதிக்க தங்களை கடவுளாக நினைத்து ஓடி வரும் நோயாளிகளின் கிட்னியை திருடி ஏமாற்றி விற்கும் தற்கால அடாவடி அதிகாரங்களை நினைவூட்டும் கதாபாத்திரங்கள்,காட்சிகள்,வசனங்கள் என இயக்குனர் ராஜு முருகன் அவருடைய தனித் திறமையால் மிக சிறப்பபாக இயக்கி இருப்பதை பாராட்டலாம்..

மொத்தத்தில், ‘மை லார்ட்’ சமூகப் பிரச்னையை சொல்லும் படம்.

ரேட்டிங் 3/5.