‘வித் லவ்’ – திரைப்பட விமர்சனம்!

CHENNAI:

“வித் லவ்” என்ற  இப்படத்தில் அபிஷன் ஜீவிந்த், அனஸ்வரா ராஜன், தேனி முருகன், கலைமாமணி சரவணன், ஹரிஷ் குமார், காவியா அனில் , சச்சின் நாச்சியப்பன், சாச்சனா ,ஆர் ஜே ஆனந்தி, டிம்பிள் கண்ணா, சித்தார்த் மற்றும் பலர் நடித்துள்ளனர். ஜியான் பிலிம்ஸ் சார்பில் சௌந்தர்யா ரஜினிகாந்த், எம்.ஆர். பி என்டர்டெயின்மென்ட் நிறுவனத்தின் சார்பில் மகேஷ் ராஜ் பசிலியான் தயாரித்திருக்கும் ‘வித் லவ்’ படத்தை எழுதி இயக்கியிருக்கிறார்.

ஒவ்வொரு மனித வாழ்க்கையில் ஏதாவது ஒரு விதத்தில் காதல் நிச்சயம் உருவாகி இருக்கும்.. அந்த காதலை அறியாத, புரியாத மனிதர்கள் சிலர் இருந்தாலும் சிலரது காதலை ரசிக்காமல் இருக்க முடியாது. எத்தனையோ காதல் கதைகளை காவியமாகவும் கல்லறையாகவும் நாம் படித்து தெரிந்து கொண்டு இருப்போம். நாம் காதலிக்கும்போது ஏற்படும் உணர்வுகளை ஒரு திரைப்படத்தில் பார்க்கும் போது நம்மையும் மீறிய பல வேதனைகள் நம் கண் முன் எழும். அந்த வரிசையில் வந்திருக்கும் படம் ‘வித் லவ்’

இப்படத்தின் நாயகனான சத்யசீலன் என்ற அபிஷன் ஜீவிந்த்திற்கு அவருடைய அக்காள்  ஆர்.ஜே.ஆனந்தி பல இடங்களில் திருமணத்திற்காக பல இடங்களில் பெண் பார்த்து வருகிறார். அவர்களது இரு வீட்டார் ஏற்பாட்டில் மணமுடிக்க பெண் பார்க்கும் படலமாக ஒரு ஹோட்டலில்  இருவரும் சந்திப்பதாக ஏற்பாடு செய்கிறார்கள். அங்கே நாயகி மோனிஷா என்ற அனஸ்வரா ராஜன் வருகிறார். அங்கு அபிஷன் ஜீவிந்த் மற்றும் அனஸ்வரா ராஜன் இருவரும் தங்களைப் பற்றிய விபரங்களை பரிமாறிக்கொள்ளும் போது, தங்களது முதல் காதல் மற்றும் அதனால் ஏற்பட்ட அனுபவங்களையும் பகிர்ந்து கொள் கிறார்கள்.

அப்போது அவர்கள் வாழ்க்கையில் ஏற்பட்ட பல சுவாரஸ்யமான விஷயங்களை பேசும்போது,  இருவரும் ஒரே பள்ளியில் பயின்றவர்கள் என்பது தெரிகிறது. அப்போது அவர்கள் இருவருமே காதலில் விழுந்து, அந்தக் காதல் சந்தர்ப்ப சூழ்நிலை காரணமாக தோல்வியை தழுவிய விஷயத்தையும் மனதிலிருந்து வெளிக் கொண்டு வருகிறார்கள். இந்த சூழலில் கதாநாயகி அனஸ்வரா ராஜன் நீ யாரிடம் உன் காதலை சொல்ல நினைத்தாயோ அந்த காதலியை தேடிப் பார்த்துச் சொல்லிவிடு, நானும் என் காதலனை பார்த்து காதலை சொல்லிவிட்டு நம் திருமணத்தை முடித்துக் கொள்ளலாம் என்று கூறுகிறார் அனஸ்வரா ராஜன்.  தனது பள்ளிப் பருவக் காதலியையும்,  அனஸ்வரா ராஜன் தனது முன்னாள் காதலனையும் தேடி சந்திக்கத் திட்டமிடுகிறார்கள். முடிவில் அபிஷன் ஜீவிந்த்,  அனஸ்வரா ராஜன் இவர்கள் இருவரும் இணைந்து தங்களது முதல் காதலை தேடிச் செல்கிறார்கள். இறுதியில் அவரவர் காதலன், காதலியை இருவரும் சந்தித்தார்களா? இவர்கள் இருவருடைய திருமணம் நடந்ததா… இல்லையா? என்பதுதான் வித் லவ்” படத்தின் மீதிக் கதை.

‘டூரிஸ்ட் பேமிலி ’என்கிற தன் முதல் படத்தின் மூலம் ஒரு வெற்றிகரமான இயக்குநராக விளங்கிக் கவனம் பெற்ற அபிஷன் ஜீவிந்த் இதில் சத்தியசீலன் என்கிற சத்யாவாக நடித்துள்ளார்.  ஒரு மென்மையான குணம் கொண்ட இளைஞனாக கதாபாத்திரத்திற்குத் தேவையான களங்கமில்லாத அப்பாவித்தனமான முகபாவனைகளை மிகச் சரியாக வெளிப்படுத்தியுள்ளார். பள்ளி மாணவன், திருமண வயது இளைஞன் ஆகிய இருவித தோற்றங்களில் கச்சிதமாக பொறுந்துவதோடு, நடிப்பின் மூலமாகவும் அனைவரையும் ரசிக்க வைத்திருக்கிறார்.

தமிழில் முதல் முறையாக அறிமுகமாகும் முதல் படத்தில் அனஸ்வரா ராஜன், ஏற்றுள்ள  மோனிஷா கதாபாத்திரம் எளிமையான அழகோடு, அசத்தலான நடிப்போடும் கவனம் ஈர்க்கிறார். குறிப்பாக, உணர்ச்சிகரமான தருணங்களில் மிகை நடிப்பைத் தவிர்த்து எதார்த்தமான நடிப்பை வழங்கி இருப்பது அவரது முதிர்ச்சியைக் காட்டுகிறது.

கதாநாயகன் நாயகியின் முதல் காதலர்களாக நடித்திருக்கும் காவ்யா அனில், சச்சின் நாச்சியப்பன் ஆகியோரின் கதாபாத்திரங்கள் கதைக்கருவின் அடித்தளமாக அமைந்திருந்தாலும், அதற்கேற்றவாறு அவர்களும் சிறப்பாக நடித்திருக்கிறார்கள்.

நாயகனின் தந்தையாக நடித்திருக்கும் தேனி முருகன், பள்ளி ஆசிரியராக நடித்திருக்கும் சரவணன், நாயகனின் நண்பர்களாக நடித்திருக்கும் ஹரிஷ் குமார், சச்சின் நாச்சியப்பன், சித்தார்த், நாயகியின் பள்ளி தோழிகளாக நடித்திருக்கும் டிம்பிள் கண்ணா, சாச்சனா, அக்காவாக நடித்திருக்கும் ஆர்.ஜே.ஆனந்தி ஆகியோர் தங்களது பணியை குறைவில்லாமல் செய்து  இருக்கிறார்கள்.

ஒளிப்பதிவாளர் ஸ்ரேயாஸ் கிருஷ்ணா ஒளிப்பதிவில் அவர் பல படங்களில் சிறந்த முறையில் பதிவு செய்ததை போல இப்படத்திலும் மிக அழகான ஒளிப்பதிவினை ரசிகர்கள் ரசிக்கும் வண்ணம் கடைசிவரை கொடுத்திருப்பதை பாராட்டலாம்.

ஷான் ரோல்டனின் இசையில் வரும் மறந்து போச்சே மனசு மரத்துப்போச்சே, அடடா இவளா என் பக்கத்துல….ஆகிய பாடல்களும் படத்தில் இளமைத் துள்ளலாக ஒலிக்கின்றன.காதல் வலியையும் அவர் காட்டத் தவறவில்லை.பின்னணி இசையின் மூலமும் ஷான், தனது பலத்தைக் காட்டியுள்ளார்.

எழுதி இயக்கியிருக்கும் மதன், முதல் காதல் அனுபவங்களையும், மென்மையான உணர்வுகளையும் மையப்படுத்தி கதை எழுதி, அதற்குண்டான திரைக்கதை அமைத்து ஒரு பெண்ணின் மனஉணர்வுகள் மட்டுமின்றி கடந்த கால காதல் நினைவுகளை அசை போடுகின்ற  விதத்தில் காட்சிப்படுத்தி, பார்வையாளர்களை இரண்டு மணி நேரம் மகிழ்ச்சியோடு பயணிக்க வைத்திருக்கும் இயக்குனரை பாராட்டாமல் இருக்க முடியாது.

மொத்தத்தில், ‘வித் லவ்’ காதலர்கள் ரசிக்கும் படம்.

ரேட்டிங் 3/5.